Hechos 10:2-22

²Truibe Tiuswan truba isua pasrabig Tiuswan køriibala marøb megabig købig køn, mayeelø nui yaueløba kerrigu. Katø misaameran chugurrin kømuielan isua asha purugub tabig marøb, katø managucha Tiusba wamindamigwane pesannamø, marøb megabig købig køn.

³Indiibe kan maaben las tres køsrøn kan piab lataigu Tiuswei ángel tørgandø kenamisri ashibig køn, nø wainug kebarrua trenchibig: —¡Cornelio!— cha.

⁴Inchen Corneliobe ángelwan ke tab ashabe, truba kwaarig trenchibig køn: —¿Señor, chinda?— cha. Inchen ángelbe trenchibig køn: —Tiusbe ñi nøba wamindiilan mørøb, katø tru chugurrin kømuielan ñi isua asha purugub tabig mariilan pesannawa, wamøwei indan cha.

⁵Møimbe Jope ciudasrømay møguelø ør cha, Simón taigwan wamønrrab, katø nøbe Pedrogucha munchi køn cha.

⁶Truibe katøgan Simónwei yau, ya peba tsun cha, Simónbe tru kalusmeran kullaarana tabzhig tamarøbig mar pulu ya pasraig køn— cha.

⁷Inchen tru ángel nun waminchibig iben latatø, Corneliobe pagatø nui karuindiig melabelanba, katø kan suldau nui trendø trag melabelai utuig Tiuswan truba isua pasrabigwanba wamabig køn.

⁸Incha maig kuigwan nømun kerrigu eshkawabe, Jopemay amrrai ørøbig køn.

⁹Indiibe katø kwaløm Cornelio øriilø maywan ambub kua, yandø Jopesrø pub ambub køben, Pedrobe kwaløm tøbøtag lutau køsrøn wambig yabala Tiusba waminchab nebibig køn.

¹⁰Inchen nune truba mag isub parøgwaben, nuyasig mamig nenøb kømne, kan piab lataig tøgagøbig køn.

¹¹Srømbalabe kurim pasrøben, kan nu llensu lataig pib tsøbmerayu litsig piraumay kørraarri ashibig køn.

¹²Inchen tru llensuyube chi animalgurrimbunø tøgaig købig køn, pib srøppar køben, pirau srala amøñibelø køben, pala amøñib illimera køben ke.

¹³Inchen kan wam trendai mørøbig køn: —¡Pedro kurrab, kweecha, ma!— cha.

¹⁴Inchene Pedrobe trenchibig køn: —¡Señor, paare, kan treekkucha mana maramø! cha. Kan nabe managuen maimíig mamønrrai merigwan ma kømøwei, chish mariimíigwan ma kømøwein kur— cha.

¹⁵Inchen tru wambe katøyug waminchippe trenchibig køn: —Tius tabig chishig mara kørrømarigwane, ñibe mamgaig trømbøig kønmab asha tøgagømøta— cha.

¹⁶Treetø treetø pønmay kenamisren, tru llensune ¡katø! møi møi srømbalasrømay kusruptindig købig køn.

¹⁷Inchen Pedrobe tru nø piab lataig asiibe chi chibig kønrrabgømab isub, nuinetø mumayguen kømui wamnetø, Cornelio ørig møgueløbe Simónwei ya chugúin kui paya, yaskabu chabguen pubguen inchibelø køn.

¹⁸Inchabe: —Kuaje chabe, payibelø køn: ¿Kan Simón, katø nundøwei Pedrogucha taig, yu ya peba tsuita?— cha.

¹⁹Inchen Pedrobe tru nø piab lataig asigwan maig kermab isubsrø wamnetø, Espíritu Santobe nun trenchibig køn: —¡Au! ñune pøngatø møguelø lab køn cha.

²⁰Kurrab, yugurri kørraya, kan mandø inchab kømab isuptø pasrømøtø, nømba inrrø cha. Kaguende nømune na ørar— cha.

²¹Inchen Pedrobe tru Cornelio øri møguelan wamønrrab ashchab kørraarruabe, trenchibig køn: —Tru ñim lab kuibe, na kur cha. ¿Kan chindamig lataig palai amrrugue?— cha.

²²Inchen nømbe trenchibelø køn: —Nambe Cornelio ørig amrruer cha. Truibe suldau søtø cienwan nø karub pera pasrabig, katø sølgandø tabig, Tiuswan køriibala pasrabig, katø truigwane maya judíosmera truba tabig køn chib wamindinab møg køn cha. Truigwane kan Tiusweindø tarømari ángelgurri maig indamigwan kenamarin køn cha, ñun nui yamay arringarua, tru ñi wamindigwan nø mørtrai.—