Hechos 10:14-29

¹⁴Orzeꞌ na Bed: ―Cueꞌ Shuaana̱. Ya̱ rila wada̱w de coz bag nu rlyuu leey ni Moisees, nunu rila wada̱w coz nu a̱ꞌ yad ñi nu da̱w ―nay.

¹⁵Orzeꞌ na gaꞌ Ñgyoozh rab mi yu tuubaꞌ tir: ―Benu ya̱ Ñgyoozh bicy caacya̱ la coz, orzeꞌ cueꞌ niir nu ndeꞌ bag nañ ―nam.

¹⁶Chon tir guc de coz zeꞌ. Orzeꞌ lueg la negy zeꞌ gupaꞌñ baa.

¹⁷Orzeꞌ Bed gush yu shcab nañ lardooy ben lac yaruu de coz nu bruu zac loy. Laab or la zeꞌ byad yuꞌ ni Simo̱o̱ ni de mbecy nu bzuu nez Cornelio. Guchuꞌ dey roꞌ.

¹⁸Orzeꞌ rbish ti dey nu bdugyiꞌy ben a zu tub yu nu la Simo̱o̱, laab yu zeꞌ yu nu la Bed, lo de mbecy nu yuꞌ zeꞌ.

¹⁹Na Bed gabee rash yu shcab par nu gyet lag yu cuen lac yaruu de coz nu bruu zac loy. Orzeꞌ Espiriit Yon ni Ñgyoozh nam rab mi yu: ―Bzuub gyidag. Zu chon mbecy nu ryub dey ru.

²⁰Orzeꞌ na bzu lily laa. Bet la. Cueꞌ gyicy cyup ic ru nu cha nur dey, gun ya̱ bzuu neza̱ dey ―nam.

²¹Orzeꞌ Bed bet yu. Zay lo de yu zeꞌ. Orzeꞌ nay rab yu dey: ―Ya̱ yu nu ryub der zeꞌ. ¿La riñ yad der lo̱? ―nay.

²²Gazeꞌ nu na dey: ―Cornelio, yu nu riib ic tub gaynal soldad, bzuu nez yu de̱ ya̱ yapa̱. Yu zeꞌ tub mbecy nap. Rca lagy yu lo Ñgyoozh. Nunu dela de mbecy Israeel nap rnii dey niy. Tub anc ni Ñgyoozh mniiy loy nu cuedz yu ru char yuꞌy, gun orzeꞌ gac gyeñ yu coz nu rlagy ru niir ―na dey.

²³Orzeꞌ Bed mniiy nu chuꞌ dey nañ yuꞌ, nunu mniiy nu gyeche dey zeꞌ. Orzeꞌ tuubaꞌ dzi bzu lily Bed nu za nuy dey, nunu la be de bicy na nu yuꞌ Jope za nuy yu.

²⁴Orzeꞌ gal tuubaꞌ dzi bri dey Cesarea. Zeꞌ blez Cornelio, nu de famil niy, nu de yu nu tonaꞌ la amig niy. Tub nac laa de yu zeꞌ bredz yu.

²⁵Na ornu Bed bruꞌñay roꞌ Cornelio, orzeꞌ Cornelio za cheel yuy. Orzeꞌ gusu tib yu loy nu driib zily yuy.

²⁶Tees Bed pshes suy yu. Orzeꞌ nay: ―Wes su gun niꞌ ya̱ naca̱ mbecy gal nu na ru ―nay.

²⁷Orzeꞌ Bed zaab ro lay riidz nu Cornelio lat nu ya dey nañ yuꞌ. Ornu guꞌy nañ yuꞌ, orzeꞌ bzaac yu nu yuꞌ zigy mbecy nu byatublaazh nañ yuꞌ zeꞌ.

²⁸Orzeꞌ na Bed rab yu dey: ―De ru nap rad lagy der nu leey ni de mbecy Israeel wazaan ñi nu gac nu dey mbecy nu walab mbecy Israeel. Nunu wac nu cha zaab lo dey loy. Tees Ñgyoozh blyuum ne̱ nu cueꞌ ne̱e̱ lo ni tub mbecy nu nac yu mbecy bduneꞌ o nu nac yu mbecy nu a̱ꞌ yad ñi nu cha zaab lo̱ lo.

²⁹Orzeꞌ ornu bredz ru ya̱, wanne̱e̱ deeta̱, sinu lueg la yapa̱. Tees na rlagya̱ gad lagya̱ la gyiꞌ bredz ru ya̱ ―nay.