Hechos 10:12-27

¹²Itech non manta owalayah miakeh yolkameh de nawi inmikxiwah, yolkameh non motilanah ixko tlali iwa totomeh.

¹³Ijkuakó okikak se tlájtoli non okili: —Ximoketsa Pedro, xitlamikti iwa xitlakua.

¹⁴Pedro otlanankili: —Amó, Noteko, porke ayik nikuajtika itla tlan amo chipawak nion itla pitsotik.

¹⁵N tlájtoli oksepa okínotski iwa okili: —Tlan Dios yokichipa, amo xikijto amo chipawak.

¹⁶Ijkó otlamochi eyi welta, iwa san nima n manta oksepa omókopki ilwikak.

¹⁷Pedro omoka san tlakaktok, omokuatlapowijtoka tlan kijtosneki tlan okimonextili. Ijkuakó okalakikoh kan kaltentli itlakawah n Cornelio non otlajtlantiwalayah kan icha n Simón.

¹⁸Otlakakalatskeh iwa otlajtlankeh kox ompa okalotitoka se tlakatl non itoka Simón, akin noiwa kinotsah Pedro.

¹⁹Iwa kemi Pedro ok omokuatlapowijtoka tlan kijtosneki tlan okimonextili, n Espíritu Santo okili: —Xikkaki, eyi tlakah mitstemoah.

²⁰Ximoketsa, xitemo iwa xio inwah. Amo xikmoli kox tias noso amó, porke Ne onikintítlanki.

²¹Ijkuakó Pedro otemok okinmajsito n tlakah non Cornelio okwalintítlanki, iwa okinmili: —Ye ne akin nomejwah nonkitemoah, ¿tlan nonkimonekiltiah?

²²Yejwah otlanankilijkeh: —Otechaltítlanki n kapita Cornelio. Ye se tlakatl yekmilajka iwa kitlakita Dios, iwa nochteh n judíojteh kitlakitah iwa kitlasojtlah. Se iángel Dios okili mamitsnotsaki iwa xiwia icha, para makikaki nochi tlan tejwatsi tikilis.

²³Ijkuakó Pedro okinkalaki ijtik icha iwa okinkaloti non yúali. Keman owalmostlatik Pedro oyá inwah. Sikimeh tokniwah de Jope noiwa oyajkeh inwah.

²⁴Ijkuak owalbiktlatik okalakitoh Cesarea kan Cornelio sa okinchixtoka. Noiwa ompa okatka ichantlakawah iwa oksikimeh tlakah non satlawel íwa omowikaya.

²⁵Ijkuak Pedro okalakito, Cornelio okiski okinselito kan kaltentli iwa san nima owalmotlankuáketski iyakapa para kiweyiliskia.

²⁶Pero Pedro okiketsalti, iwa okili: —Ximoketsa, porke ne noiwa san ni tlakatl kemi te.

²⁷Iwa motlapowijtiwih okalakeh sansikah. Ompa ijtik kali Pedro okinmajsito miakeh tlakah.