Hechos 10:11-27

¹¹Tse rebelasionninchomi riquecorqan sielu quicharëcaqta, y tsepita imeca juc jatun jacuno chuscun cuchunpita watashqa patsaman uräquecamoqta.

¹²Tsechomi canaq lätepa pureq animalcuna, tuquilaya bolepa pureq pishqucuna, y tuquilaya chuscu chaquiyoq animalcunapis.

¹³Y wiyarqan queno parlapaqnintam: —Pedru, sharquï, y que animalcunata pishtacacharcur miquï —neqta.

¹⁴Pedrunam queno yasquerqan: —Teyta, ¡quecunataqa manam micushaqtsu; porqui manam ni imepis melanepaq raccha animalcunataqa micushqatsu cä!

¹⁵Tsenam yape parlaparnin, queno nerqan: —Dios bendisishqantaqa ama “Queqa melanepaqmi” ninquitsu —nir.

¹⁶Quima cuti tseno ricatsenqanchonam sieluman tse jatun qepinano llapan animalnintin juclla cuticorqan.

¹⁷Tsemi Pedru “¿Imapaqraq que llapanta riquecülla?” nir, yarpacachar quecaptinna, Corneliupa cachancuna qarapita suela ruraq Simonpaq tapucur tapucur wayinyaq chäriyarqan.

¹⁸Puncupitanam qayacuyarqan, queno nishpa: —¿Quechocu posadacushqa callan Simon niyashqan Pedru? —nir.

¹⁹Rebelasion ricanqanpita Pedru yarpacachar caquicaptinnam, Santu Espiritu queno nerqan: —Pedru, canan öram quimaq nunacuna qamta ashicayäshunqui.

²⁰Canantä sharcur, yarpï. Pecunawan ewë; ama mantsaquïtsu; porqui noqam tse nunacunata cachamorqö —nishpa.

²¹Tsenam rarapita yarparamurnin, nunacunata queno nerqan: —¿Imaqllataq shayämorqonqui? Ashiyanqequi nunaqa noqam cä —nishpa.

²²Tse nunacunanam queno niyarqan: —Soldaducunapa capitannin Corneliu cachayämaptinmi shalläyämorqö. Pëqa allapa alli nunam y Dios respetaqmi. Tsemi llapan israel nunacunapis allapa respetayan. Diospa santu anjelninshi nishqa pepa wayinman qamta pushayänaqpaq y llapan nenqequita pe wiyananpaq.

²³Tsenam tse nunacunata chasquirir, Pedru posadacaratserqan. Waräninnam pecunawan jeqariyarqan; y Jope marcacho Jesusman waquin creyicoqcunapis Pedruta yanaqarninmi ewayarqan.

²⁴Waräninnam Cesarea marcaman chäriyarqan. Corneliunam combidashqa canaq castancunata y allapa cuyanacuyanqan amiguncunata Pedruta chasquiyänanpaq.

²⁵Wayinman chäriyaptinnam, Corneliu yarqaramorqan chasqueqnin; y qonquripa patsam ratecorqan Pedrupa nopanman, peta adorarnin.

²⁶Peru Pedrunam sharcaratserqan, queno nirnin: —Sharquï; noqapis qamno nunallam cä —nishpa.

²⁷Tsenomi Corneliuwan parlar parlar ruri wayiman Pedroqa yecurerqan; y atscaq nunacuna ellurëcayaqtam tarirerqan.