Hecho 12:10-19

¹⁰Jamatii Penohua esohuidojojji quishishijji cuayaquijeya ebionei sohuinano epi nequi yejje canananaje. Jamatii ojaya Peno, esohuidojojji peaꞌai ba jjima poanaje. Mama pishana nequi pea ba canana oꞌoyanaje sohuinano. Yejje canana oꞌoyanaje. Ba jjima poanaje Peno, esohuidojojji peaꞌai sohuinanoja. Poquinaje baa cui esecue quea quemo huasijje. O poeꞌyajo jamatii jjacaꞌapejoquinaje. Esecue jjani yasijje cuayaquiꞌyonaje. Cuama pishana dojo majje esohuidojojjiya Peno jea canaꞌyonaje, ejiojjijo.

¹¹Majoya Peno jjashahuabaquinaje: ¿Aꞌa mo eshe, aꞌa mo jjacahuibaquiani pojjeama, de? Jjeya ecuea eba Emeshi Mese nei Jesosaa huoojea canaje ojaya esohuidojojji e dojocuayaquiꞌyohua. Mecahuajje Enodeya eya jaja caꞌyo queaye poanaje. Jodio dejja cuaa e quecuaꞌyojji nisho ishoaꞌajja canaje peaꞌai —Peno poanaje.

¹²Majoya ma shahuaba majje Peno poquiꞌyonaje Maniaja equi yasijje, Huani Macosoja enaeseja equi yasijje. Joma equijo quea huiso Jesosaja epeejji cuana jjachichaqui majje mimi aninaje Eyacuiñajji nijje, Peno jaahuana meejji.

¹³Penohua esecue jjani cuiaqueya cañaquinaje, epeeyijji esecue jjani. Oe epona ahuemaꞌ ani Shona bajjani poeyanaje aya esecue jjani cuiaqueya cani baa.

¹⁴Ohuaya Penoja esohui shajjaꞌajja canaje. Jjashahuabaquinaje: —Eꞌe ee, Peno cuayaquiꞌyonaje. Bihui majje esecue jjani pajea canananaje. Peno esecuejo tii nequi jea canananaje epona shoꞌiya, de. Cuajicuajinananaje equijo ani cuana huohuiya.

¹⁵Jamatii equijo ani cuaa Shona jama sajaꞌame acanaje baꞌa: —Chojja, Shona. ¿Aꞌa jja mi niñepoquiani? —Eꞌe jojo nei ca ca iña poani —poanaje Shona. Jamajjeya ojjañaa jama sajaꞌame acanaje baꞌa: —Eꞌe pojjaꞌa esohuidojojji Peno jaahuanajji ca ca coma poeyanaje.

¹⁶Penohua ca ca esecue cuiaqueya canequinaje, iyaaꞌiyaa nequinaje. Equijo nequi cuaa esecue caꞌapejoꞌyo majje ba canaje Peno nequi. Quea bihui nee nee poꞌyo majje soa neineiꞌyonaje.

¹⁷Jamajjeya Penohua emeꞌ sisi ecuasajo huana canaje: —¡Aꞌa pa jjaja oe mimijji! —poanaje. Ojjaña mimimaꞌyo nequi caꞌyonaje. Majoya Penohua oya cuana huohui canaje: —Emeshi Mese neiya Jesosaa eya ejeanobia jaa esecue yasijje jjequiquiaya meequi caꞌyonaje esohuidojojjiya. Majoya huohui canaje peaꞌai Penohua: —¡Ojjaña Jesosaja epeejji cuana huohuiquicue! ¡Satiaco Apeoja bacua ejja peaꞌai huohuiquicue! Majoya Peno quehua poquicuajinaje pea meshi yasijje.

¹⁸Mecajjeahua sohuinano cuaa chamaꞌ Peno ba canaje ejjajeanobiaquijjijo. Ejjoco oe jaa ba canaje. Chamaꞌ. Ba majje oya cuana quea mete nee nee poꞌyonaje. Miminaanaa nequiꞌyonaje.

¹⁹Emeshi Mese Enodeya pea huoojea canaje Peno jjequiya nisho ejajajeaꞌyojji nisho. Peno chamaꞌ ba majje Enode quea mase nee nee poanaje. Sohuinano cuana ma Peno jaahuanajji cuana ꞌya canaje. Huohuiꞌajja canaje: —¿Aꞌa mi oe cahuijaanaje? —cahuijaa poso Enodeya acanaje. Majoya Enodeya huoojea canaje ma sohuinano cuana quecuajeaꞌyohua. Chamaꞌyo tii acanaje. Majoya Enode Jodea meshijo nequi Sesanea huasijje poquinaje. Jomajo nequi tiitiiꞌyonaje.