Hahnibo 8:1-35

¹Saulo rihbi cahen jaa mahuati queeni. Jaatianbi ta Jerusalen janinxon noquen huetsabo tiromajamenocannishqui hihti tiromajaquin. Tiromajahahbo jatihibi jabisi. Judea maibo janin, Samaria maibo janin rihbi jabiscani. Criston raantibo res jabayamahi.

²Papahon shinanaibaan ta hihti huinixon Esteban tsahonnishqui.

³Hoa Saulonen ta noquen huetsabo potojaquetannishqui. Jaton xoboboho hihquicahinxon cahen jato bihquin. Bebobo, haibobo rihbi coshin bi res boxon sipo xoboho jato tsahonquin.

⁴Jabisipibaan sca Papan joi yohibonaquin jaabo jano cahiton.

⁵Samaria jema janin caxon ta Felipenin jato Cristo joi yohibonanishqui.

⁶Jan yohihi nincaxon cahen jan hahan honantibojahi jisxon huesti shinanyaxon nincacoincanquin hahqui tsamajaquetaibaan.

⁷Jaan yohihah ta hicha tiroma yoshinyahpabo janinhax tiroma yoshinbo coshin sai saihihquish piconishqui. Yora honanyamajaquetaibo betan chantobo hihti caibo rihbi rohacahini.

⁸Jaa copi ta jaa jema janinhahbo hihti jenimanishqui.

⁹Felipe nocorihyamahiya cahen jaa jema janin huesti joni janish, Simon janeya. Jahuen yobepan hahxon cahen Samaria mai mehabo rahtehax, Hea tah hen coshi joni qui hihcachihi.

¹⁰Jaa yobe yohuanaiya ta jatihixonbi nincacanpahonishqui. Jaton jonibaan, jaton patorobaan, jatihibichin nincaquin. Nea joni ta Diosen coshi qui, jahuen hihti coshi hahcaibo, hahcanquin.

¹¹Jahuen yobepan basi jan jato rahte rahtepahoni copi jaan yohihah nincacanquin.

¹²Jaabi Papan jato jihuemayaxihqui joi siri Felipenin yohihah nincacoincanquin. Jesucristo joi siri yohihah nincacoinaiton Felipenin jato nashimaquin, haibobo, bebobo rihbi.

¹³Simoman rihbi sca nincaquin. Felipenin nashimaha Felipe manati sca hahbetanbi nichi. Hahan honantibo Felipenin hahcai, jan Papan coshiyaxon tsoan jascajani que ma bi hihti coshin hahcai jisish Simon rahte rahtescai.

¹⁴Samaria mai mehabaan Papan joi bihcoinai honanscaxon cahen Jerusalen janinxon Criston raantibaan Pedro betan Juan jato qui raanquin.

¹⁵Raanahbo cahax nocoxon sca Dios Yoshin bichibo hihxon jato yocaxonquin.

¹⁶Jesusen jane huestichin Felipenin jato nashimahi quen ta Dios Yoshin jato qui botopaquerihyamanishqui. Jaa copi cahen jato yocaxoncanquin.

¹⁷Yocaxonxon mehehah Dios Yoshin bihresscacanquin.

¹⁸Criston raantibaan mehehah Dios Yoshin bichibo jisxon Simon jato coriqui hinancatsihscai.

¹⁹—Hea rihbi jascajati hahtipahmanahue, hean mehehahbaan sca Dios Yoshin bihnon —jato jaquin.

²⁰Pedronen sca: —¿Papan hinanresai jahuen yoshin min coriquinin maroti shinanain? Miin coriquiyabi mia queyoyaxihnon.

²¹Min tah min jahuabi bihtimahi. Jahuabi tah min bihyamayaxihqui. Papan jisí ta miin jointi tiromah qui.

²²Min tiromajaquin shinanai pontescahue. Hihbo yocahue, min tiromajati shinanai jan sohuanon.

²³Jointi mocapaiya mia notsi notsihi jihuetai tah hen jisi, hohchapan hiná tah hen mia jisi —hahquin Pedronen.

²⁴—Maton caya hea yocaxonnahue man hea yohihi quesca jayamanon —hahquin Simoman.

²⁵Jaatian sca jaabaan jisobo yohixon noquen Hihbaan joi siri rihbi yohihax Jerusalen janin cahi caribihi. Samaritanobaan jemabo janin joi siri yohibonahi bocani.

²⁶Noquen Hihbaan yonotinin sca ta Felipe yohinishqui: —Caresscahue. Jerusalen janinhax Gaza janin cahi bahin picoti catanhue chiponqui —hahquin. Jaa bahin cahen tsoabi jihueyamahan.

²⁷Caresscaax jano sca cahi. Picoti cahi jisí bi Jerusalen janin Papahon shinantanipish Etiopía joni jaa bahin jahui. Jaa cahen hapo. Etiopíabaan quiquin haibo hapon coriqui coirannicah. Jahuen hapon jane cahen Candace.

²⁸Isaíasnen huishani joi jisanan jahuen taramehtinin tsahotax cabachonen ninihah taramehquirani jahui.

²⁹Dios Yoshiman sca Felipe yohiquin: —Behchitanhue. Jahuen taramehti janin nanetanhue —hahquin.

³⁰Bishquihihcanahi caxon sca Isaías janeya Papan joi yohinicaton huishani joi jisish jaa yohuanhonahi nincaquin. Nincaxon yocascaquin: —¿Min jisi joi min honanain? —hahquin.

³¹—¿Jenquetsahaxon hen honantihin, huetsan hea yanapanyamahiya? Hea patax tsahoti nanehue —hahquin.

³²Jan jisbenahi huishani joi ta nea qui: Carnero rehtenoxon hiohah bi neteresai quescarihbihi ta jahua hihyamahiqui. Jahuen rani rahmaxcorohah bi carnero baque sai saihihyamabiresai quescarihbihi ta yohuanyamahihqui.

³³Jaa rabinmaxon ta pontejayamaquin casticancaniqui. Rehteres ta Tsoa jahuen xohtabo quin hih tsoabi jayamascanon hihqui jaa quirica.

³⁴Jaatian: —¿Yohinica jascarai tsoa yohihiquin? ¿Jaabi nan? ¿Huetsa joni nan? Hea yohirohahue —Felipe yocaquin.

³⁵Jaatian sca jaa quiricaya yohuanxon Jesusen joi siri Felipenin yohiquin.