Hahnibo 4:6-27

⁶Jaton quiquin sacerdote Anas, Caifas, Juan, Alejandro, jaabo, quiquin sacerdotebaan jenabo jatihibi rihbi jato betan tsinquiti.

⁷Pedro, Juan naponbi nichinxon yocacanquin: —¿Jahua coshin man hahquipiquin? ¿Jahua janen man jascajahipiquin? —jato jaquin.

⁸Dios Yoshiman hihbojaha sca Pedronen jato yohiquin: —Jema hihbobon, noquen hapobon.

⁹¿Jenquetsahaquin man nea chanto rohajahipiquin? ¿Jahuatohon man jaa rohajahipiquin? hah man noque jaiya tah hen mato yohihi, man honannon hihxon.

¹⁰Jatihibi noquen caibaan honannon hihxon tah hen mato yohihi. Maton tah man Jesus Nazareno jihui qui hueonmaxon rehtehohqui. Jaa man rehtehipi bi ta Papan hahquirihbi teehihmahoxqui. Jahuen janen tah non nea rohajahipiqui, rahma siri sca mato bebonbi nihnon.

¹¹Jaa Jesus ta hahqui xobojati jihui quescapah qui, tiroma tah qui hihxon man xobojahibaan potanih que bi.

¹²Jaa huestichin ta noque teehihmati hahtipahiqui. Huetsa noque teehihmanica ta yamahihqui ni jahuenbi. Jaa huestichin jonibo teehihmanon ta Papan jaa yohihihqui —jato jaquin.

¹³Raquetaxma Pedro betan Juan yohuanai jisxon, escuela janin hihpahonima bi jemama qui hanini rabe jato honanax rahtecani. Jesus betan nihpahonibo sca jato honancanquin.

¹⁴Rohajahipi joni jato patax nichi jisxon joi bichincatsihxon bi jahua yohiti hahtipahyamacanquin.

¹⁵Tsinquitaiboma qui jato picomahax res sca yohinannanscacani:

¹⁶—¿Jahueja non jato jatihin? Hahan honanti hani ta hahquipicanaxqui. Jatihixonbi ta Jerusalen janinhahbaan honanihqui. Hahyama ta jaipicanaxqui, hih tah non jatimahi.

¹⁷Jaabi, jaa joi huetsabo janin caícanayamanon jato yohinon benahue. Jaa janen yohuanyamascanahue, non mato rishquimis jistahi man tan, hahquin jato yohinahue —hihcani.

¹⁸Quenamaxon sca jato hihti yohicanquin: —Jesusen janen yohuanyamascanahue tsoh. Jahuen janen tsoabi yohiyamanahue —jato jacanquin.

¹⁹Jascahahbo Pedro betan Juaman jato yohiquin: —¿Papan jisi jahuemeha ponte quin? ¿Mato noquen nincati nan? ¿Noquen Papabi non nincati nan? Shinannahue.

²⁰Noque tah non non jisnibo chaniti jai, non nincanihbo rihbi yohiti jai.

²¹Jascaraiton jato tahtijaribicanquin. Jema janin jato nincacatsihquibo hicha jai quen jenquetsahaxon casticanti honanyamaxon tahtijaribixon jato Boresscatannahue hahrescanquin. Jaa rohajahipi honanxon texe jatihixonbi, Hahxon tah min jaa jai Papan, jaiboya, casticanti hahtipahyamacanquin.

²²Hahan honantijaquin jaabaan rohajahipi joni ta cuarenta bari janishqui, hashoan rihbi. Jaa copi cahen jatihixonbi jaa honancanquin.

²³Boresscatannahue hahcabo sca jaton hahberabetibo qui caxon jaton sacerdote hapobo betan jaton hanibaan jato tahtijahi yohicanquin.

²⁴Yohiha jatihixonbi Papa yocacanquin: —Hihbon, naiyahpa mai, hian, janobo jai jatihibi rihbi tah min hahniqui.

²⁵Miin Yoshin siri mian hinanah ta noquen xenibo David miin jonixon miin joi yohinishqui: ¿Jahua copi noquen nahuabo sina sinatihquin? ¿Jahua copi noquen caibaan honanma jai joibo yohiti shinanihquin?

²⁶Mai meha quiquin hapobaan ta jaton sontarobo nichinihqui rehtemanoxon. Jaton hapobo tsinquicani, noquen Papa rehtecatsihqui, jan caisai joni rihbi rehtecatsihqui hah ta Davidinin janishqui huishaquin.

²⁷Jascacoini. Herodes, Poncio Pilato, nahuabo, noquen caibo, jaabo jatihibi ta nea jema janin tsinquihoxqui. Minabi miin joni qui sinatax ta tsinquicanhoxqui. Min caisai miin Jesus qui ta sinacanhoxqui.