HAHEMAORO TAUDIA 20:15-40

¹⁵Una dina ai Beniamina taudia hanua hanua amo e hebou na tatau gerebu-rua daha-tauratoi mai edia dare; bona Gibea taudia edia tuari taudia mai goadadia be tatau sinahu-hitu.

¹⁶Ini iboudiai bogaragidiai na ima-lauri taudia mai goadadia sinahu-hitu; idia iboudiai na vilipopo amo nadi bema tahoa, hui autamona basiema reaia.

¹⁷Beniamina iduhuna taudia na unuhohodia; a Israel iduhudia oredia edia tatau na domaga hani mai edia dare. Unu iboudiai na tuari taudia.

¹⁸Israel taudia na e tore isi, Betele ela, Dirava e nanadaia, eto, Edena iduhu bainela guna, Beniamina taudia baine tuari henidia? Iehova eto, Iuda iduhuna baine guna.

¹⁹Daba ai, Israel taudia e tore isi, Gibea vairanai e taruha.

²⁰Bena Israel taudia ese Beniamina taudia e tuari henidia, Gibea vairanai e gini.

²¹Bena Beniamina taudia na Gibea amo e raka lasi, Israel taudia gerebu-rua daha-rua e aladia mase una dina ai.

²²A Israel taudia na e haheauka, tuari gabuna ai ma e gini lou, tuari dinana gini-gunana ai e gini heḡereḡerena.

²³Israel taudia na e dae lao, Iehova vairanai e tai boi; bena idia ese Iehova e nanadaia, eto, Tadikakamai Beniamina taudia ma baia tuari henidia lou eiava? Iehova eto, A tuari henidia.

²⁴Taunabunai, Israel taudia ese Beniamina taudia ma e tuari henidia lou, dina iharuana ai.

²⁵Bena Beniamina taudia na Gibea amo ma e raka lasi, dina iharuana ai, Israel taudia gerebu-ta daha-taurahani e aladia mase. Unu iboudiai na tuari taudia mai edia dare.

²⁶Bena Israel taudia, tuari oreana idoinai, na ela, Betele ai e kau, bena e taitai. Idia na Iehova vairanai e helaiva, e vaga una dina ai, ela bona dina e diho. Bena ḡole-oho bouboudia bona herohemaino bouboudia e hahelaḡadia, Iehova vairanai.

²⁷Bena Israel taudia ese Iehova e nanadaia; badina be unu dinadia ai Iehova ena taravatu mauana na unuseni mia,

²⁸bona Fineha Eleasara, Aaron tubuna, na una maua vairanai Iehova isiaina e lao heniva unu dinadia ai. Taunabunai idia ese e henanadai, eto, Tadikakamai Beniamina taudia ma baia tuari henidia lou, eiava vada baia hadokoa? Iehova eto, Ma baola; kerukeru umui imamui ai baina atodia.

²⁹Taunabunai, Israel na edia tuari taudia haida e siaidia, Gibea bae bani henia.

³⁰Dina ihatoina ai, Israel taudia ese Beniamina taudia ma e tuan henidia, Gibea vairanai ma e gini, nega gunadia heḡereḡeredia.

³¹Bena Beniamina taudia na ituari-henidia e raka lasi, hanua na e rakatania; bena nega gunadia heḡereḡeredia idia na e ala-ala matama, Israel taudia haida laolao daladia ai e aladia mase, Betele dalana ai bona Gibea dalana ai, bona tano paka ai danu haida e aladia mase. E aladia taudia na Israel taudia toi-ahui sisivana.

³²Bena Beniamina taudia e hereva heheni, eto, Vairadai vada e darere, nega gunadia heḡereḡeredia. A Israel taudia e hereva heheni, eto, Aita heau, hanua amo baita veridia oho laolao daladia ai.

³³Bena Israel taudia iboudiai na e tore isi, ela, Baal-tamara ai e gini heḡaeḡae; a Israel taudia hahidaosi hanua e bani henia taudia na edia komu gabuna, Geba lahara kahana, amo e heau lasi.

³⁴Bena tuari taudia mai goadadia gerebu-ta Israel taudia iboudiai edia amo e abidia hidi na Gibea e tuari henia. Tuari na auka herea; Beniamina taudia danu lalodia asie parara edia darere negana na kahira-kahira.

³⁵Bena Iehova ese Beniamina taudia e hadareredia Israel vairanai. Israel taudia ese Beniamina taudia gerebu-rua daha-ima sinahu-ta e aladia mase una dina ai: iboudiai na tuari taudia mai edia dare.

³⁶Taunabunai Beniamina taudia na lalodia e parara vada e darere. Israel taudia na Beniamina taudia vairadiai e heau, badina be Gibea ibani-henina vada e siaidia taudia e abidadama henidia.

³⁷Una negana ai hanua e bani henia taudia e heau lasi haraḡa-haraḡa, Gibea e daea, bena idia ese hanua taudia iboudiai na dare amo e aladia mase.

³⁸Israel taudia bona hanua e bani henia taudia na edia henega ai toa ta vada e gwauraia guna. Toana binai: lahi kwalahuna ori na heto hanua amo baine dae negana ai

³⁹Israel taudia na bae gini kerehai tuari ai. Una negana ai Beniamina taudia ese vada e ala-ala matama, Israel taudia toi-ahui sisivana vada e aladia mase. Bena idia eto, Momokani, idia na vairadai vada e darere, tuari gunana ai heḡereḡerena.

⁴⁰A hari toa, lahi kwalahuna, e dae matama negana ai, Beniamina taudia e roha kerehai; madi, hanua idoinai kwalahuna e daeva guba ai.