HADIBAIA TAUNA 5:7-19

⁷Badina be nihi momo bona hereva momo, be anina lasi. Unai dainai oi ese Dirava do oi gari henia.

⁸Bema gavamani ese ogogami taudia ia hisihisi henidia, bona kota maoromaoro, bona ahuna korikori ia henidia lasi neganai, do oi hoa bada lasi. Badina inai bamona idia karaia noho kota biagudia, edia biaguna badana ese inai totona idia ia oda henia, bona inai badana danu be tau badana momokani ese ia oda henia, bona idia ibounai ese unai gageva kara hegeregerena idia karaia noho.

⁹Inai bamona kara dekena amo, inai kota biagudia bona edia badadia ese profit moni idia abia noho taunimanima edia tano gaukara dekena amo. Inai badadia ese unai moni be idia edia huanai idia haria noho. Ma king danu ese profit moni ia abia noho taunimanima dekena amo.

¹⁰Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho. Bona kohu momo ia ura henia noho tauna ese iena kohu do ia habadaia, to ena bada be hegeregere lasi ia dekenai. Inai kara danu be anina lasi.

¹¹Oiemu kohu bona moni be bada neganai, taunimanima momo dekenai aniani do oi henia. Unai dainai, oiemu kohu momo edia anina be do oi abia lasi, to oiemu matana dekenai do oi itaia sibona.

¹²Gaukara tauna ena bogana do ia kunu, o do ia hitolo, to iena mahuta be do ia namo. To kohu momo tauna ena gau momo dainai ia laloa hekwarahi, bona ia mahuta namonamo lasi.

¹³Dika badana ta tanobada dekenai lau itaia be inai: Tau ta ese kohu momo ia haboua, to unai kohu ese unai tau idia hadikaia.

¹⁴Bona hekwakwanai ia vara dainai, unai kohu do ia boio, vadaeni unai tau ena natuna tau ese kohu do ia abia lasi.

¹⁵Tau ese sinana ena bogana dekena amo ia mai neganai ia be kopina kavakava, bona inai tanobada ia rakatania neganai danu do ia kopina kavakava. Tau ena hekwarahi ibounai be anina lasi, badina gau ta iena imana dekenai ia abia lao diba lasi.

¹⁶Inai be maoro lasi, ani? Ita mai hegeregerena ma do ita lao. Ita hekwarahi noho, to iseda hekwarahi dekena amo dahaka ita abia? Ita ese lai ita lulua kava noho sibona.

¹⁷Iseda mauri dina ibounai, be daradara, bona lalohisihisi, bona laloa hekwarahi, bona gorere, bona badu lalonai, ita haorea noho, ani?

¹⁸To inai dala tamona lau itaia, ia be namo bona hegeregere: Dirava ese mauri dina momo lasi taunimanima dekenai ia henia. To tau ta be do ia aniani, do ia inuinu, bona iena gaukara dekena amo ia abia gaudia do ia moalelaia, badina iena ahuna korikori be unai.

¹⁹Bema Dirava ese tau ta dekenai kohu bona moni ia henia, bona goada danu ia henia, unai gau do ia moalelaia totona, unai be Dirava ena harihari gauna. Unai tau ese Dirava do ia tanikiu henia, bona iena hekwarahi dekenai ia abia gaudia do ia moalelaia be namo.