Hacutjin Casahmi Apóstol 19:2-18

²Hane cuitjin cachja me cojo xuta jan: ―‍¿Há cavisehen Hasen rë Nina cahntsua xahasen nuju hya xi camangutacún cojo Jesús? ―‍Cuatjin cachja me. Hane xuta jan ne, cuitjin cafayangui me: ―‍Hisca camachayiin niji cjua xi tjin xi hmí rë Hasen rë Nina. ―‍Cuatjin cafayangui me.

³Ngajan xi Pablo ne, cuitjin cachja nga me: ―‍¿Hacutjin caxtenda ngayun ni? ―‍Cuatjin cachja me. Hane xuta jan ne, cuitjin cafayangui me: ―‍Caxtenda ngayin sacuatjin cavitenda nima Juan. ―‍Cuatjin cafayangui me.

⁴Ngajan xi Pablo ne, cuitjin cachja nga me: ―‍Juan vë ne, cavitenda me xuta hya xi xuta jan ne, catsindeya me cjuatacun rë me, hacuaha cachja me cojo xuta jan xi catamangucacun me cojo me xi sehe cjuehe, me xi hacui Jesús. ―‍Cuatjin cachja nga Pablo.

⁵Xi cahndë xuta jan cjua vëhë ne, caxtenda me xi cumatangun cjuatacun rë me cojo Nai naja Jesús.

⁶Hane xi cavisanetsja Pablo xuta jan ne, canduva Hasen rë Nina, cavisehen cahntsua xahasen rë xuta, hane cachja me hne xi hisca hvíin me, hacuaha cachja me cjua xi casua Nina me.

⁷Hane má sacuaha tejó xihin me xi yëjë me.

⁸Hya xi camá ne, quiji Pablo yungun rë xuta tjë rë Israel, cachja me cojo xuta. Hane cahntsua jyan sá ne, cuatjin fi me yungun, hane hacuiin cojo chircun rë me chja me cojo xuta tsëhë gubiernu xi sahmi Nina.

⁹Peru ngujo xuta jan ne, casahmitaja rcu me, hane camacjaain rë me, hane choho cachja me tsëhë ndiya rë Jesús xcun yëjë ni xuta. Vëhë xi Pablo ne, cavetjuxin me tsëhë xuta jan, hacuaha quijicojo me xuta ladu rë Jesús. Cavetsihin me nchunchujun ni cachja me cojo xuta ngajan scuela rë ngu me xi hmí rë Tirano.

¹⁰Cuatjin casahmi me cahntsua jo nu, vëhë xi yëjë xuta xi siu ngajan Asia ne, camachaya rë me tsëhë cjua rë Nai naja, sa xuta tjë rë Israel ne, o sa xutaxín.

¹¹Jemu jyë cjuarcun casahmi Nina ngajñi rë xa xi casahmi Pablo.

¹²Hisca tsjian xi sahmixa cojo Pablo ne, quijicojo xuta casua rë me xuta hmu rë, hane chíhin rë me ne, cavetjuxin, hisca xitsehen xi hincha xahasen rë yahnga me ne, hacuaha cavetjuxin.

¹³Peru ngujo cha tjë rë Israel xi tsujyihiya vaxëxin cha xitsehen xi hincha xahasen rë xuta ne, hacuaha camameje cueyanangui cha ñihi rë Nai naja Jesús hora xi tivaxëxin cha xitsehen, hane cuitjin cachja cha: ―‍Tsëhë xi Jesús casuaxa ná me, me xi chja Pablo tsëhë ne, tivitéxa nuju xi cuetjunxun. ―‍Cuatjin cachja cha.

¹⁴Cha xi cuatjin sahmi vë ne, hacui yatu cha quihndi rë ngu nahmi xi hmí rë Sceva, ngu nahmi xi matitjun tsëhë xuta tjë rë Israel.

¹⁵Hane ngu ndiya xi cuatjin cachja cha ne, cuitjin cafayangui xitsehen jan: ―‍Jesús ne, hvë me vëhë. Hacuaha hvë Pablo. Peru ngayun ne, ¿yo ngayun? ―‍Cuatjin cafayangui xitsehen jan.

¹⁶Hya xi camá ne, me xi hincha xitsehen xahasen rë jan ne, cacaataha me cha, hane cacaa rë me catsinguijne me yëjë yatu cha, tsëhë xi jemu hñu ngahñu rë me. Cuatjin camá xi jemu casacuhmu rë cha xi cuacun jan, hane cavanga cha tu quixti ni tsëhë ndihya hiscan siu cha jan.

¹⁷Xcusun xi camá vë ne, camachaya rë yëjë xuta nandya Efeso, sa xuta tjë rë Israel ne, o sa xutaxín. Hane ngayëjë ni me ne, jemu catsacjun me camá, hane camá jyë camá hnga Nai naja Jesús.

¹⁸Hane jemu cjín xuta xi ha cavisehen me ladu rë Jesús ne, fitjengui me Pablo vijacun me tsëhë cjuasurqui xi sahmi me.