Hékmet toplighuchi 10:2-19

²Danaliqning köngli onggha mayil, exmeqningki solgha.

³Exmeq kishi hetta yolda méngiwatqandimu, uning eqli kem bolghachqa, u exmeq ikenlikini hemmige ayan qilidu.

⁴Hökümdarning sanga achchiqi kelse, ornungdin istépa berme; chünki tinch-sewrichanliq xata-sewenliktin bolghan zor xapiliqni tinchitidu.

⁵Quyash astida yaman bir ishni kördumki, u hökümdardin chiqqan bir xata ishtur —

⁶exmeqler yuqiri mensepte, shuning bilen teng baylar pes orunda olturidu;

⁷men qullarning atqa min'genlikini, emirlerning qullardek piyade mangghanliqini kördum.

⁸Orini kolighan kishi uninggha yiqilishi mumkin; tamni buzghan kishini yilan chéqishi mumkin;   

⁹tashlarni yötkigen kishi tash teripidin yarilinishi mumkin; otun yaridighan kishi xewpke uchraydu.

¹⁰Palta gal bolsa, birsi tighini bilimise, paltini küchep chépishqa toghra kélidu; biraq danaliq ademni utuq-muweppeqiyetke érishtüridu.

¹¹Yilan oynitilmay turup, yilanchini chaqsa, yilanchigha néme payda?

¹²Dana kishining sözliri shepqetliktur; biraq exmeqning lewliri özini yutidu.

¹³Sözlirining béshi exmeqlik, ayighi rezil telwiliktur;

¹⁴emma exmeq yenila gepni köpeytidu. Biraq héchkim kelgüsini bilmeydu; uningdin kéyinki ishlarni kim uninggha éytalisun?

¹⁵Exmeqler japasi bilen özlirini upritidu; chünki ular hetta sheherge baridighan yolnimu bilmeydu.

¹⁶I zémin, padishahing bala bolsa, emirliring seherde ziyapet ötküzse, halinggha way!

¹⁷I zémin, padishahing mötiwerning oghli bolsa we emirliring keyp üchün emes, belki özini quwwetlesh üchün muwapiq waqtida ziyapet ötküzse, bu séning bexting!

¹⁸Hurunluqtin öyning torusi ghulay dep qalidu; qollarning boshluqidin öydin yamghur ötidu.

¹⁹Ziyapet külke üchün teyyarlinar, sharab hayatni xush qilar; lékin pul hemme ishni hel qilar!