GWAY GI IDAWUU’D 9:7-20

⁷Hili Tap̱a a’di ic̱a’bki’d i mo ma ḵursi ma maliḵ ki sule/ mo. A’di ṯelki’da ḵursi ma maliḵ piti mo gom gwon dwall jin toru gwo ’twa/a ’cesh mo,

⁸dhali a’di dwallki ’kwaniny’cesh gwo ki mii ma ḵar/e mo. A’di midi dwall ’kwani gwo ki dar gi mii ma gwar ’de/ mo.

⁹Tap̱a a’di ’bitha’bi’th me’da cur gom uni gun yap̱kunu mo, a’di ta’da cur jin ’bitha’bi’th ka tee jin ṯojuwa ṯo’c bwa mo.

¹⁰Dhali uni gwansan kun mishki gway piti mo tani dhuki moŋgam gwo is buni e /e mo, haali/ gom /e mo tani ayy Tap̱a /e diki dhal uni gwansan ’pen mo gun simmki /e e mo.

¹¹Yuḵi gway ki maŋi Tap̱a mo a’di jin di’d eya Sihyuun mo. Ṯori miin tom piti e bwaman ma ris ’kwani mo.

¹²Haali/ a’di jin ri’cki’da bas mo tani a’di diki this uni e mo dhali a’di diki this ko e mo, ko gi a’di jin wo’ckunu is she/ mo.

¹³Miiyi mii ma ’the gom aha/ mo ma, ayy Tap̱a. Hili mo mo ma to jin ’koshi aha/ is ka nyor mo tani a’di ta to ’peni uni gwansan kun shi/ki aha/ i e mo, Ayy /e jin ’de’kki aha/ mo ’peni ’twaŋkal gi mowu mo,

¹⁴ki aha/ mina rasha ris momaŋ pini e mo, ki eya ris ’twaŋkal ma goŋ gi ’bwa/ ma Sihyuun mo ki aha/ mina bwa ’kuny mo e mony’cuḵ pini mo.

¹⁵Aris kal gi ’kwaniny’cesh cic̱kin ’teki jorom mo e jis kun c̱wanykina uni mo, eya nyoḵ kun bagkina uni mo tani a’di bu’thki uni isho’k buniŋ gana/ mo.

¹⁶Tap̱a dhalki is piti ki a’di minu mish mo, a’di torki gwon dwall ’twa/a ’cesh mo, uni gun ta thus ki thus mo tani bu’thkin ma gumem buni kun uḵkina uni ki me’d buniŋ gana/ mo. Higgaion. Doshi ma dhali ’cunycuri yan mo.

¹⁷Uni gun ta thus ki thus mo tani uni mini c̱eker bwa mo eya Haawiya mo, aris kal gi ’kwaniny’ceshi ’baar mo kun thiskina Arumgimis e mo.

¹⁸Haali/ uni kun mini mii ta gi to mo tani uni minu mii ’koki this e isa yempa/ mo, dhali mo ma ’teŋ kap̱e/ gi uni gun hatha’ko’d mo tani uni minu ’koki ’ce’d sho’k ki sule/ mo be.

¹⁹Cuyi mis mo, ayy Tap̱a. Dhalku/ ki dhal ’kwani mmop̱i gwo jip̱i/ mo. Dhalka ris kal gi ’kwaniny’ceshi ’baar mo dwallu gwo mo ibwambori jis/em pini mo.

²⁰Dhuyi uni ki mo ma ḵo/ is mo, ayy Tap̱a. Dhalka ris kal gi ’kwaniny’cesh ki mish uni mo ki uni tana ta, uni ta ’kwaniny’cesh mo! Doshi ma dhali ’cunycuri yan mo.