GWAY GI IDAWUU’D 89:1-20

¹Aha/ mina yuḵ gway gom mo/en pini jin ṯelu sho’k mo, ayy Tap̱a, ki sule/ sule/ mo. Ki ’twa/ pem mo tani aha/ mina bah gwo gom mo ma isiŋ ganam pini eya risa nyaḵum yil gi ’kwaniny’cesh mo.

²Haali/ mo/en pini jin ṯelu sho’k mo tani a’di ṯelkunu ki sule/ sule/ mo. Mo ma isiŋ ganam pini a’di rwa’ckunu mo me’d momis mo.

³/E ki o gwo mo ki: Aha/ gamkina gwo me’d ki jin ’dem pem jin kwanyka/ mo. Aha/ thulkina gwo me’da p̱o/ goma Dawuu’d jin ta c̱iŋkinam pem mo.

⁴Aha/ mina ṯel emen pini sho’k ki sule/ sule/ mo, dhali nyaŋa ḵursi ma maliḵ pini goma risa nyaḵum yil gi ’kwani mo. Doshi ma dhali ’cunycuri yan mo.

⁵Dhalki momis maŋ momer pini mo, ayy Tap̱a, dhali mo ma isiŋ ganam pini e dhana tul ’kup̱ gi ’kwani kun ḵogu mo.

⁶Haali/ kaja a’di jin di’d e momis gunn kun uḵu jin minu kar ka p̱ar nyaḵki Tap̱a mo? Kaja ibwaman uni gi momis jin wakina e ki Tap̱a mo?

⁷Arumgimis a’di jin ḵo/kunu eya dhana tul ’kup̱ gi ’kwanim piti kun ḵogu mo, a’di jin caaca mo dhali jin ta’da pure/ mo ap̱owa ris uni ’baar mo kun ’kamki a’di is mo.

⁸Ayy Tap̱a Arumgimis gi momis mo, kaja a’di jin ta jima dem dem me’d /e mo? ayy Tap̱a, nyaḵki mo ma isiŋ ganam pini jin ’kamki /e is mo.

⁹/E jikina ji ap̱o/ yi’de/ jin birki bakal mo. Ki lanthinem pini jin cukina a’di mis mo tani /e doshki uni mo.

¹⁰/E siri’ckina Rahab ap̱o/ ki sho’k mo me’d buŋgwar isa goŋgoro/ mo. /E ḵwa/ki ’kwani kun ta ’kup̱ ki /e ’twa/ mo ka bim pini jin c̱a’bki dem dem mo.

¹¹Momis ta kum pini mo dhali mony’cesh si’da/ ta jim pini mo. Mony’cesh dhala ris to ’baar kun ’kon e a’di mo tani, /e ḵa’bki uni mo be.

¹²Abora bim poros dhali abora biny cam /e uḵki uni mo. Wosh ma Tabur dhali Wosh ma Harmuun uni ’kunykina bwa gom gway pini mo.

¹³/E takin ga bim pini jin c̱a’bki dem dem mo. Me’d pini ’bitha’bi’th mo, me’da bim poros pini turatur mo.

¹⁴Mo ma ḵar/e dhali mo jin dhunuwa dhu ka p̱o/ uni ḵa’bkina ḵursi ma maliḵ pini mo dhali mo/en jin ṯelu sho’k mo dhali mii ma isiŋ ganam pini mo uni iikini bwambori /e mo.

¹⁵Mom’bor mii gom ’kwani kun mishi cuu mo e mo ma tul ’kup̱ jin yuḵuwa yuḵ mo, uni gun iikin mo, ayy Tap̱a, e moŋkush gi jis/em pini mo,

¹⁶uni gun ’de’k gway isi mis gom gway pini ka tee ’baar mo, dhali kar mo ma ḵar/em pini ki ca mo.

¹⁷Haali/ /e ta monyca gom mom’bi’th is buni mo. Ki mii ma ’them pini mo tani cem bam karkunu ki ca mo.

¹⁸Haali/ agoŋgoro/ gi me’d bana mo tani a’di ta ji gi Tap̱a mo, amaliḵ bana mo tani a’di ta ji gi A’din ’De/ jin Ḵogu jin ta jima Israyiil mo.

¹⁹Haali/ ’pena dhamo/ mo tani /e ṯorki gwo ki tonyjan mo ki a’dim pinin ’de/ jin ta isiŋ gana/ mo dhali o a’di gwo mo ki: Aha/ karkina toŋ’kup̱ ’dolkon ap̱o/ jan ’de/ a’di jin c̱a’bki dem dem mo, dhali aha/ karkina a’di ki ca, a’din ṯal ’de/ yan jin kwanyu/ mo ’peni ’kwani mo.

²⁰Aha/ gamkina Dawuu’d mo a’di jin ta c̱iŋkinam pem mo. Ka yin pem jin ḵogu mo tani aha/ ki ’koshki a’di mo.