GWAY GI IDAWUU’D 81:1-12

¹Yuḵi um gway ki ’kal ’kal eya Arumgimis jin ta mom’bi’th bana mo. Ḵumi cuuwa/ mo gom bwaŋ ’kunyka/ eya Arumgimis ma Yakuub mo.

²’Deki gway abor ki mis mo ki ko ma dheŋdhenye/ jin p̱inu ki me’d mo, adheŋdhenye/ jin ’kon ma shu/i pesu/ mo jin ’kunya’kuny mo dhali adheŋdhenye/ mo.

³P̱iyi apoome/ ka ppen this mo, dhali ka ppe jin ta’da kunn is mo, ka cim jin yuḵuwa yuḵ ka tul ’kup̱ bana mo.

⁴Haali/ a’di ta gwoŋḵan jin bahu gom ’Kwani ma Israyiil mo, dhali gwoŋḵan ma Arumgimis jin onu ki ’twa/ goma Yakuub mo.

⁵A’di ki kar gwoŋḵan goma Yuusup̱ mo, me’d jin yakina a’di ka pije/ e Pam Masir mo. Aha/ ciḵkina ’twa/ mo a’di jin molkika/ mo.

⁶Aha/ soroṯẖkina /e ’kup̱a bim pini ’peni ton diṯi’d mo. Me’d pini karu ki ’kus ’pena nura/ mo.

⁷E mo ma c̱is pini mo tani /e yuḵkina yuḵ mo dhali aha/ ’cuḵkina /e mo. Aha/ thoḵkina /e ’twa/ ka ḵwal is e mo jin dor ma shoka dor mo. Aha/ palkina /e mo e yi’de/ ma Mariiba mo. Doshi ma dhali ’cunycuri yan mo.

⁸Ciḵi gwo mo ma, ayy ’kwanim pem, dhali aha/ mina ḵucur um mo ki ḵucur pa mo. Ayy Israyiil, waḵki/ /e mina bwa ’taki oyi, hili dhali ciḵ aha/ gwo mo.

⁹Wakan ka rum p̱inycon kun luŋa ’kwanin tiya midi diki di e bwam um mo. Wakan ki um mini ’koki luŋ ka jiŋ ’kup̱a’dup̱un gom tomp̱inycon jin luŋa ’kwanin tiya mo.

¹⁰Aha/ tana Tap̱a Arumgimis bum mo, a’di jin suski um ka pije/ ’peni Pam Masir mo. Ḵa’di ’twam bum ki waŋgal mo dhali aha/ mina ’tu’d a’di ki piny piny mo.

¹¹Hili ’kwanim pem ’koki ciḵ ’twam pem mo, Israyiil midi ’taki ta gi jim pema kamuwa?

¹²Wakan aha/ c̱ikina uni bway mo eya dum buni kun miin ki wa’th wa’th mo, mmobaṯẖ gwom buni kun logoma bwam buniŋ gana/ uni mo.