GWAY GI IDAWUU’D 78:60-71

⁶⁰A’di ki dhal mom piti ’pen jin c̱a’bkina a’di jin ta Pan Shilu mo, e gu’ba’ku/ jin c̱a’bkina a’di e bwaŋ ’kwani mo,

⁶¹dhali a’di ki ’cuḵ mom’bi’th piti ap̱o/ uni gun bu’thkunu mo mmota c̱iŋkina/ mo, dhali monyca gi me’d piti ap̱o/ ’kwani kun ta ’kup̱ mo.

⁶²A’di ki c̱i ’kwanim piti e me’d gi uni kun ḵal gandal mo, dhali kuma nyor piti mo ap̱o/ uni kun ta mal piti mo.

⁶³O’d shwaki ’kwani kun ta dhuru’c buni mo, dhali nyaram buni uni dar gi gway gi momash mo.

⁶⁴Igasiis buni ṯa’kkina ’cesh gom shemen gandal mo, dhali up̱a dhalla/ gi igasiis mo, moŋkamu/ gwona uniya?

⁶⁵Dhali yan’ko’d Tap̱a merki e mo ’peni mo jin wana e ki mo jin ishkina a’di e mo, me’d wathi/ jin ’bitha’bi’th jin ’therki cuuwa/ gom yimana mura’th jin p̱ina a’di jin ḵa/u ki ŋah ŋah mo.

⁶⁶Dhali a’di ki dhu ’kup̱ piti mmoḵwa/ bwa mo. A’di ki dhu uni e mo ma ’the is ki sule/ sule/ mo.

⁶⁷A’di ki waḵ gu’ba’ku/ ma Yuusup̱ mo, dhali a’di diki kwanya waḵ ma Ep̱rayim mo.

⁶⁸Hili a’di ki kwany awaḵ ma Yahuuda/ mo, a’di jin ta ’Kuwosha Sihyuun, a’di jin ena a’di mo.

⁶⁹A’di ki nyaŋ mom piti jin ḵogu mo me’d mo jin eḵa/ eḵ e momis mo, dhali me’d mony’cesh jin ṯelkina a’di sho’k ki sule/ sule/ mo.

⁷⁰Dhali a’di ki kwanya Dawuu’d jin ta c̱iŋkinam piti mo, dhali sus a’di mo ’peni mo jin hila a’di ḵa’bal mo,

⁷¹’peni mo jin hila a’di ushi nas ḵa’bal kun bwan mo tani a’di ki sus a’di mo mmota amanhil ḵa’bal gom ’Kwani ma Yakuub mo, a’di jin ta’da Israyiil jin ta mal piti mo.