GWAY GI IDAWUU’D 77:7-19

⁷Mina Tap̱a usha ush ki sule/ mo dhali diki mii mii ma ’the doḵ/e ’taa?

⁸Mo/en piti jin ṯelu sho’k daḵki’d mo ’taa? Dhali aris gwom piti kun onu is ’kokin ntagi ’pemen ma risa tee ’baar mo ’taa?

⁹Arumgimis thiski mii ma ’them piti e mo ’taa? Dhala nyor piti jin shwakina a’di mo tani a’di daḵki’da hil hil ki e ma ’thime/ ki mo/en mo ’taa? Doshi ma dhali ’cunycuri yan mo.

¹⁰Dhali aha/ ona gwo mo ki: A’di ta aha/ jin jwakaṯkunuwa du mo ki me’d gi a’di jin Caa e ki Ca aḵki mii e mo.

¹¹Aha/ mina ka mii gi Tap̱a e mo. Nye, aha/ mina ka momer piti e ’peni kun dhamo/ mo.

¹²Aha/ mina kulum gwo ibwa goma ris miin tom pini mo dhali ṯikir gwo kulum ibwa gom mii ma dem dem pini mo.

¹³Bway pini, ayy Arumgimis, a’di ḵogu mo. Ka rum jana caaca me’da Arumgimis banaŋ gana/ mo?

¹⁴/E tana Arumgimis jin miiki momer mo, /e jin piki mo ma dem dem pini ibwaman ’kwani mo.

¹⁵/E ki me’da bim pini mo tani /e ki wan ’kwanim pini ’ba/ mo, uni gun ta iya/ ma Yakuub mo dhali ku ma Yuusup̱ mo. Doshi ma dhali ’cunycuri yan mo.

¹⁶Ka ris yi’de/ p̱arki /e e mo tani ayy Arumgimis, ka ris yi’de/ p̱arki /e e mo tani uni ḵo/kina ḵo/ is mo, nye, uni gun ’kula’kul mo tani deekina is ki bir bir gom moŋḵo/ is mo.

¹⁷Dhali araḵ kun ’kani mis wolki yi’de/ mo, dhali momis si’da/ dhalki mondor ma sho’k me’d mo. Dhali athop̱am pini a’di dhwa/a’dki’d ki dhwa/a’d dhwa/a’d mo eya ris ’twaŋkal kuku/ mo.

¹⁸Dhali mom pini jin ’twaḵa mondor ma sho’k mo tani a’di diki’d e ’tham kun ’theḵkin mo. Awara sho’k pini a’di kushki mony’cesh mo, dhali mony’cesh deeki’d ki bir bir mo dhali yiḵin is mo.

¹⁹Bway pini diki’d e bwam ḵumma/ yi’de/ mo dhali bway tur pini diki’d eya dhan yi’de/ mo. Dhala dum bwam sho’k pini jin yana /e mo tani mishuwa?