GWAY GI IDAWUU’D 74:3-20

³C̱uthi /e ŋaṯgin pini e mo jin ’tuḵkunu ki sule/ sule/ mo. Uni gun ta ’kup̱ ki ’kup̱ mo tani ’ce’dkina ris to sho’k mo e mo jin ḵogu mo.

⁴Uni gun ta ’kup̱ ki /e mo tani aŋkarkin e bwaman mom pini jin ḵogu mo. Uni thumkina bereḵ buniŋ gana/ mo mmota jamas mo.

⁵Dhali e ’twaŋkal gu’b isi mis mo tani uni ki jep̱ cwandher bwa ka thurmany mo.

⁶Dhali yan’ko’d aris cwa kun ’cimudhu bwa mo tani uni ’ce’d uni ka ’cesh ka thurmanya ba’d’ban mo dhali ki ’dorro/ mo.

⁷Uni ki c̱i’th mom pini jin ḵogu ki o’d mo. Uni ki shi/a ’cesh pini jin c̱a’ba /e ki gway pini mo.

⁸Uni ki o gwo e is buni mo ki: Ana mina uṯẖ uni ’baar mo. Uni ki c̱itha ris mo jin tulu is goma Arumgimis e mo yan mo.

⁹Ana ’konaki p̱ar jamas bana e mo. Dhala manc̱i gwoŋ kamu/ di’da? Dhali jaŋ kamu/ di’di bwam ana jin mishi gwo ki mii yan midi ta ata?

¹⁰Ayy Arumgimisa, /e mini dhal ’kwani kun ta ’kup̱ bway mo mmo’theḵ shushi mis ki rash rash kan ntagi mo gi wakata mo? A/’kwani kun ta ’kup̱ ki /e mini sor gway pini ki sule/ sule/ kan mo?

¹¹Ki to jin ta’da ta si’da/ igukina /e me’d pini ka nyaŋ’ko’d mo? Ki to jin ta’da ta ikarkina /e me’d pini e bwambor pini mo?

¹²Hili Arumgimis jin ta’da maliḵ pem mo a’di jin diki’d ’peni kadhamo/ mo, jin miiki bway gi mowoṯẖ e bwaman gi mony’cesh mo.

¹³/E ki ḵwa/ dhan yi’de/ bwa ki mii ma dem dem pini mo. /E ki ’ce’d ’kup̱ ma dhan tasha/ ki bwam yi’de/ mo.

¹⁴/E ki pwaṯẖ ’kup̱ gi dhan to yi’de/ mo, dhali /e ki c̱i a’di mmota tonṯe/ gom uni kun uḵu kun ’kon e bwaasho mo.

¹⁵/E ki tirki wosh mo dhali ḵa’d a’di ’twa/ mo dhali du’d yi’de/ mo dhali yi’de/ ki ’thonthor mo. /E ki ḵu’thki yi’de/ jin sokin e bwam ma gap̱ mo.

¹⁶Atee ta jim pini mo. Mon’thiny si’da/ ta jim pini mo. /E ṯelki moŋkush gi momis sho’k mo dhala tente/ mo.

¹⁷/E thosonkina ris gwayu/ gi mony’cesh mo. /E karki moyurantee mo dhali mondiṯ mo.

¹⁸Kayi gwo yan e mo ma, ayy Tap̱a, ’kwani kun ta ’kup̱ ’theḵki shushi mis kata sa/ mo? dhali ’kwani kun ’koki dhu mii gun ḵogu mo tani waḵki gway pini mo be.

¹⁹Dhalku/ ki c̱iya ḵashira/ gi gurkom pini ki tom bwaasho mo. Dhalku/ ki ŋa mondiki/e gi a’dim pini jin hatha’ko’d ki sule/ sule/ mo.

²⁰Kari gwom pini jin gamu me’d mo. Haali/ mo gi mondhurumi’d gi mony’cesh mo tani a’di ’tu’dkunu mo ki ’kwani gwahan kun bujurkina bujur mo.