GWAY GI IDAWUU’D 73:1-27

¹Ka jiŋ gana/ Arumgimis ta a’di jin ’boro’d gom uni kun dhelel ma du mo, gom uni gwansan kun dhelelkin eya du mo.

²Bahili gom aha/ mo tani sho’k pem ’dishi ’twa/ ’taki dheres mo, ŋaṯgin pem ’disha’dish ’taki yeres mo.

³Haali/ aha/ tana dhap̱an gom uni kun dhu is ki ca mo, ki aha/ p̱arkina mo jin rusa to ki rus gom uni kun ta thus ki thus e mo.

⁴Haali/ uni dar gi mo jin su’k uniya du ka war mo. Buŋgwar is buni c̱a’b ki c̱ur c̱ur mo dhali c̱a’b ki ’thiḵil ’thiḵil mo.

⁵Uni ṯocu ’kus me’d ’kwanin tiyaa? Dhali uni doru ki to jin woci is she/ me’d ’kwanin tiyaa?

⁶Wakan uni dhu is ki ca gom neram buni kun hitha uni i’ba/ mo, dhali mo ma bujur jin bujurkina uni mo tani a’di ’kamki uni is mo me’d burrinye/ mo.

⁷Em buni dhethadhe’th gom momoṯ buni mo, adum buni a’di kumkunu ’twa/a ’cesh ki mii ma p̱ali mo.

⁸Uni ’theḵ shushi mis mo dhali o gwo ki mo jin dup̱uwa dup̱ i e mo. Mmodhuna uni is buni eya tente/ ki ṯẖorony mo tani uni ki ruma rum gom mo jin miinu sirica siri’c ki sho’k mo.

⁹Uni ki ḵa’d ’twam buni mmosor momis mo dhala le’d buni a’di ḵalki ’pen ḵany e mony’cesh mo.

¹⁰Dhali gom gwo gi wakan mo tani ’kwani ṯu’kkin mo dhali maŋ uni mo dhali gam to shiyi’da kamu/ e uni yisa.

¹¹Dhali uni o gwo mo ki: Ki tonta si’da/ imish ma Arumgimis mo? A/a’di jin Caa e ki Ca nyiṯẖki toŋ kamuwa?

¹²Hili mo mo ma, uni gwansan ita thus ki thus mo. Isa yempa/ uni ’koni mo jin ’ka’da mii ’ba/ ki ’ka’d mo dhali uni mara to kun tana uni pa ki pa is mo.

¹³Dhali aha/ ki p̱e’th mo tani aha/ karkina dum pem ki dhelel dhelel mo dhali lam me’d pem e mo jin ’konu ka p̱o/ mo.

¹⁴Haali/ ka tee ’baar mo tani aha/ dherkunu is bwa mo, dhali dorkunu isa yempa/ mon’thamo/ mo.

¹⁵Waḵki/ aha/ mina ’taki o gwo mo ki: Aha/ mina o gwo wakan mo tani aha/ mina ’taki diki ta a’diŋ gana/ goma nyaḵum yil gi uc̱im pini mo.

¹⁶Hili ki aha/ kulumkina gwo ibwa mmomish gwo yansan ’ban mo tani a’di midi ’taki wayaa/ e ki to jin midi wu is e mmomii mo,

¹⁷ntagi aha/ yakina e mo ma Arumgimis jin ḵogu mo, dhali yan’ko’d aha/ ki nyiṯẖ ’pemen gi ’ko’d ’buni mo.

¹⁸Ka jiŋ gana/ /e ki dhu uni e mo jin yeresa/ yeres mo. /E ki dhal uni bway mo mmoṯa’k e mo jin kup̱u/ mo.

¹⁹Uni ’ce’dki sho’k kadhamowa? Uni dhidhu sho’k ka pupush ka dhan mii jin ta’da pure/ ka pure/ mo.

²⁰Uni wana e ki jan jin shu’bu/ mo me’d jin merkina jan ’deŋ kamu/ e mo. ’Peni momer e mo tani um ki waḵ to munn buni mo.

²¹Ka ḵashiram pem ḵa/ki’d ki ḵa/ mo tani dhali ki aha/ su’kkunu eya du mo,

²²aha/ takina dholgon mo dhali ta p̱us mo tani aha/ wana e ki tombwaasho ’kup̱ ki /e mo.

²³Bahili aha/ dina mmoṯikir c̱a’b nyaḵki /e mo. /E bu’thki me’da bim poros pem mo.

²⁴/E ki shu aha/ bway ki gwom pini jin logomkina /e mo dhali yan’ko’d /e mini bu’th aha/ mmotaḵ mo.

²⁵Kaja a’di itaka/ e momis mo? Hili diki ta jasi /eya? Dhali to p̱iyi’d e mony’cesh yan mo mmo/oka/ bwa mo mmodhal /e ka p̱o/ mo.

²⁶Buŋgwar is pem dhala dum pem mini ’taki ush me’d mo tani hili Arumgimis a’di ta’da Man’bitha dum pem is mo dhali Amanpwaḵ ki aha/ to jin miga/ ta ki sule/ sule/ mo.

²⁷Haali/ hili mo mo ma, uni gwansan kun si’dkin ’peni /e mo tani minu ’ce’d sho’k mo be. /E ki kar mo jin daḵu gwo ’kup̱ mo gom uni gwansan kun ṯori gwon thus ap̱o/ /e mo.