GWAY GI IDAWUU’D 72:13-20

¹³A’di ki hila hil ki e ma ’thime/ ki mo/en ap̱o/ uni gun ’ka’da is mo dhali ap̱o/ uni gun mini mii ta gi to mo, dhali ta moŋ’koki/em buni is ki me’d mo gom uni gun mini mii ta gi to mo.

¹⁴’Peni mo jin sirijuwa siri’c ki sho’k mo dhali abujur jin bujuru mo tani a’di wanki moŋ’koki/em buni ’ba/ mo, dhala bas buni ta yinthoŋ gana/ e jis/em piti mo.

¹⁵Dhalki a’di di’d ki e ki sule/ sule/ mo. Dhalki ’dolkon gana/ jin ta gi Pan Shaba c̱inu a’di mo. Dhalki mon’tho minu ṯikir ’tho gom a’di ki ṯikir ṯikir mo dhali mom’bor mii minu ’tho gom a’di ka tee ’baar mo.

¹⁶Dhalki emen tonṯe/ ishin ka enthus e bampa/ mo, ap̱owa ris ’kuwosha turga/ mo me’d jin yiḵinkina ’tham uni is mo. Dhalki maman cwam piti wana e ki ji gi Pan Lubnaan mo dhali dhalki ’kwani ’tu’dina ’tu’d mo ’peni aris ’peŋkuman bampa/ mo me’da sho gi bwam bunto mo.

¹⁷Dhalki gway piti ’dim ’kup̱ ki sule/ sule/ mo. Dhalki yir piti di’d ki sule/ sule/ me’da tente/ mo. Dhalki ’kwani ’bori is buni mii ki a’di mo, dhali aris kal gi ’kwaniny’cesh yuḵi a’di mo ki a’di jin ’boru mii mo.

¹⁸Mom’bor mii midi di gom Tap̱a mo a’di jin ta’da Arumgimis gom ’Kwani ma Israyiil mo, A’din ’deŋ gana/ imii’da dhan to gi momer mo.

¹⁹Mom’bor mii midi di gom gway gi monycam piti ki sule/ sule/ mo. Dhalki monycam piti ’tu’d mony’ceshi ’baar mo. Amen dhali Amen.

²⁰Mon’tho ma Dawuu’d mo a’di jin ta ya/ ma Yassa mo a’di ’baarkunu mo.