GWAY GI IDAWUU’D 71:1-22

¹E /e mo tani, ayy Tap̱a, aha/ bu’thkina mom pem jin hurga/ jwa e /e mo. Dhalku/ ki dhal aha/ bway ki aha/ minu kar ki mo ma ’the is mo.

²E momii ma ḵar/em pini mo tani ’cuḵi aha/ mo dhali ’cwami aha/ mo. Ḵa’di ’cem pini gom aha/ mo dhali tayi aha/ is is ki me’d mo.

³Wari /e ki wosh jin miga/ hur jwa icine/ mo, mmota acur jin ṯenu gwo mo mmota aha/ is is ki me’d mo, haali/ /e ta wosh pem mo dhali acur pem jin ṯenu gwo mo.

⁴’Cwami aha/ mo, ayy Arumgimis pem, ’peni me’d gi a’di jin ta thus ki thus mo, dhali ’peni a’di jin bu’thki’da bu’th ki ḵwap̱ mo, a’di jin diki ta ḵar/e mo dhali wathi/ jin ta maṯṯ ki maṯṯ mo.

⁵Haali/ /e, ayy Tap̱a, /e tana ’teŋ kap̱em pem mo, dhali ’pena cim pem jin gamka/ /e gwo is mo, ayy Tap̱a, ’peni dhuru’c pem jin taka/ mo.

⁶Ap̱o/ /e mo tani aha/ dikina ka linthiṯẖ ’peni mondho’th pem mo. /E ta a’di be jin bu’thki aha/ ’peni bwa ma dho’th ma ta’dam pem mo. Momaŋ pem ṯikirki di gom /e mo.

⁷Aha/ mera ’kwani ka ris ka yempa/ mo. Hili /e ta jim pem jin ’bitha’bi’th jin hurga/ jwa icine/ mo.

⁸’Twa/ pem a’di ’tu’du/ mo ki piny piny ki momaŋ /e mo dhali ki monycam pini i’baara tee mo.

⁹Dhalku/ ki biṯ aha/ asho ka tee jin miga/ ta adhan mo. Dhalku/ ki dhal aha/ ’pen mo waḵki/ aha/ mina mom’bi’th pemi ’baar mo.

¹⁰Haali/ ’kwani tana ris kun ta ’kup̱ ki aha/ mo kun oki isi gwo gom aha/ mo, uni gwansan kun c̱orki mondiki/em pem mo tani uni logomki gwo mo mmonṯal ’de/ gom aha/ mo

¹¹dhali o gwo mo ki: Arumgimis, mola /e, dhalki a’di ’pen mowa? Uri a’di isho’k mo dhali bu’th a’di mo haali/ jaŋ kamu/ di’da jin midi ’cuḵ a’di mo?

¹²Ayy Arumgimis, dhalku/ ki si’d ’peni aha/ kagahara mo. Ayy Arumgimis pem, huru/ ki jahanne/ dhali woṯẖ aha/ mo.

¹³Dhalki unim pem gwahan kun yeri aha/ is ki gway dhunu ki mo ma ’the is mo dhali shwa ki o’d ki ’ci’d’da/ mo. Dhalki uni tashu ki mo jin waḵuwa waḵ mo dhali mo jin thisuwa taḵ taḵ mo, uni gwansan kun simmki mo e jin midi shi/ aha/ is mo.

¹⁴Hili aha/ mina ta gi mo ma ’teŋ kap̱e/ ki sule/ sule/ mo, dhali aha/ mina maŋ /e naskina/ ki sule/ dhali ki sule/ sule/ mo.

¹⁵’Twam pem midi ṯor gwo gom mo ma ḵar/em pini jin ḵalkina /e mo dhali miim pini jin miina /e gom bway gi mowoṯẖ goma tee ’baar mo, haali/ mondeŋ buni a’di peki monyiṯẖ pem jin nyiṯẖka/ uni mo.

¹⁶Ki dhan mii ma dem dem gi Tap̱a Arumgimis mo tani aha/ mina p̱u’dku/ mo, aha/ mina maŋ mii ma ḵar/em pini mo, a’di jin ta jim pini /e ’de/ mo.

¹⁷Ayy Arumgimis, ’peni dhuru’c pem jin taka/ mo tani /e ṯorki aha/ gwo mo, dhali aha/ mina bah dhan momer pini jin miina /e to mo.

¹⁸Wakan, isi kani, e mo jin canu ki yil mo dhali mo jin ’kan ma wuu ’kwani mo ayy Arumgimis, dhalku/ ki dhal aha/ ’pen mo, ntagi aha/ mina bah mo ma dem dem pini mo eya risa nyaḵum yil gi ’kwani kun mini p̱u’du/ mo.

¹⁹Mom’bi’th pini dhali mo ma ḵar/em pini mo tani, ayy Arumgimis, uni jidhirkin e momis jin ḵa’dama/ ḵa’dam mo. /E jin miikina dhan to kun caaca mo, ayy Arumgimis, kaja a’di iwaki /e mo?

²⁰/E jin karki aha/ mo mmop̱ara ris monṯo’c bwa e kun surkun mo tani /e mini tash aha/ e mo doḵ/e. ’Peni moŋ’kul gi mony’cesh mo tani /e mini ’de’k aha/ abor gi mis doḵ/e mo.

²¹/E mini mar aha/ montaḵ pem is is mo dhali malas aha/ doḵ/e mo.

²²Dhali aha/ si’da/ mina maŋ /e ka dheŋdhenyem pem jin buḵka/ mo gom mo ma isiŋ ganam pini jin tana /e mo tani, ayy Arumgimis pem, aha/ mina yuḵ gway mmomaŋ /e ka dheŋdhenye/ jin ’kon ma shu/i pesu/ mo, ayy /En ’De/ jin ta jima Israyiil jin Ḵogu mo.