GWAY GI IDAWUU’D 50:1-23

¹A’din ’De/ jin c̱a’bki dem dem mo, Arumgimis jin ta Tap̱a mo, ki a’di ki o gwo mo dhali mony’cesh yuḵkunu mo ’peni mo jin sul ma tente/ mo ntagi mo jin yul ma tente/ mo be.

²’Pena Sihyuun mo tani ’bor piti shina jaro/ ime’d mo, Arumgimis ’twaḵki mo mo.

³Arumgimis bana p̱u’dki’d mo a’di diki c̱a’bki shwamm mo, e bwambori a’di mo tani a’di ta o’d jin loski’da los mo, dhali mo ’kam a’di is mo a’di jin ta’da dem dem mo tani a’di ta ’thama p̱unthar mo.

⁴A’di yuḵki’da yuḵ gom momis jin di’da p̱o/ momis mo, dhali mony’cesh mo, ki a’di midi dwall ’kwanim piti gwo mo be.

⁵Tuli aha/ kum pem is mo kun ta ku isiŋ gana/ mo, uni gun gamki gwo me’d nyaḵki aha/ ki to kun ’ciṯẖu/ ’kus mo.

⁶Momis bahki gwo gom mo ma ḵar/em piti mo. haali/ Arumgimis ki is piti mo tani a’di ta’da mandwall gwo mo. Doshi ma dhali ’cunycuri yan mo.

⁷Ciḵi gwo, ayy ’kwanim pem mo, dhali aha/ mina ṯor gwo mo, ayy Israyiila, aha/ mina ṯe gwo ap̱o/ um mo. Aha/ tana Arumgimis jin ta’da Arumgimis bum mo.

⁸Dhali aha/ dinaki ḵucur um gom tom bum gun ’ciṯẖa/ um ’kus mmomiiya bas mo, walla tom bum kun c̱ina um ki me’d mo mmoc̱i’th ki o’d mo ki ṯikir ṯikir ibwambori aha/ mo.

⁹Aha/ mina mola rasim bip̱ bu’th ’peni gu’b bum mo, walla rasi mi ’peni kal bum mo.

¹⁰Haala ris tonycuḵ kun ’kon e bwaasho mo tani uni ta kum pem mo, dhali bip̱ kun ’koni ’kuwosha alip̱ mo.

¹¹Aha/ misha ris ’dii kun p̱en e momisi ’baar mo, dhali aris to gwansan kun joc̱kin e bwam bunto mo tani uni ta kum pem mo.

¹²Waḵki/ aha/ mina ṯe/ ’taki ’kosh mo tani aha/ mina ’taki diki ṯor um gwoyi, haali/ mony’cesh dhali aris to gwansan kun ’koni bwaman a’di mo tani uni ta kum pem mo be.

¹³A/aha/ ’kana shum gi gwaṯẖim bip̱ mo? walla a/aha/ p̱ina bas mi mo?

¹⁴C̱iyi Arumgimis to jin c̱inu ki me’d mmo’ciṯẖ ’kus ki bwa jin ’boruwa ’bor i is mo, dhali c̱iyi gwom bum kun onu is ki a’di jin Eḵa/ Eḵ mo,

¹⁵dhali yuḵi aha/ ka tee jin ṯoju um bwa mo, dhali aha/ mina ’cuḵ um mo dhali um mini kar aha/ ki ca mo be.

¹⁶Hili gom a’di jin ta thus ki thus mo tani Arumgimis ki o gwo mo ki: Kaja c̱i /e shi/ mii mmorash gwoŋḵan pem kun bahu e mo, walla bu’th gwoŋḵan pem jin gamu me’d eya le’d pini mo?

¹⁷Haali/ /e shi/i mo jin dilu ’kwani abora ’ceshi e mo dhali /e ki biṯ gwom pem ki nyanygon mo.

¹⁸Waḵki/ /e ki p̱ar wathin ’di/ e mo tani /e tana mugum piti mo be dhali /e ki ta amanŋali ’pen gom uni gun buthi miinyc̱al me’d mo.

¹⁹/E ki c̱i ’twam pini bway ki ḵany mo gom tonthus mo, dhali ale’d pini ki uḵ mo jin hekuwa he’k e mo.

²⁰/E ki c̱a’b dhali ṯor gwo ap̱owa kam pini mo. /E ki thutha ’ci ki kwan ’pen mo.

²¹To gwansan miikina um mo dhali aha/ c̱a’ba ki shwamm mo. Dhali /e ṯoshkin ki aha/ nyaḵa is ki /e mo. Dhali hili shwane/ aha/ ḵucurkina /e mo, dhali kar gwoŋḵan ibwambori /e mo.

²²Nyiṯẖi gwo yansan mo ma, um gun ŋakina Arumgimis mo, isi ciki/ ki aha/ mina bwa p̱u’d ka pije/ mo dhali yan’ko’d jaŋ kamu/ midi diki di mmo’cuḵ um mo be.

²³A’di yansan jin ’doyu to ki bwa jin ’boruwa ’bor i is mo me’d to jin ’ciṯẖu/ ’kus jin ta jim piti mo tani a’di taḵ aha/ mo be. E a’di jin karki bway piti ki ’bore/ mo tani aha/ mina ṯor bway gi mowoṯẖ ma Arumgimis mo be.