GWAY GI IDAWUU’D 40:4-12

⁴Mom’bor mii gom wathi/ jin kar Tap̱a ki jim piti jin gama a’di gwo is mo, a’di jin diki ṯu’k mo e mo jin karu is ki ca mo, ki uni gwansan kun iikini per mo mmobaṯẖ gwo ma rum p̱inyconi sho’k mo.

⁵/E marki momiin tom pini kun ta momer is mo dhali gwom pini kun kulumkina /e ibwa ’kup̱ki am mo, ayy Tap̱a Arumgimis pem mo. Jamu/ p̱iyi’d jin minu kar ka p̱ar nyaḵki /e mo. Waḵki/ aha/ mina ’taki bah gwo mo dhali ṯor uni mo tani uni mini ’taki bol uni kun minu ’taki deŋ e e ka ris mo.

⁶To jin ’ciṯẖu/ ’kus mmomiiya bas mo dhali to jin c̱inu ki me’d mo tani bwam pini diki o mo. Hili /e ki tup̱ aha/ ’cem pem mmoshuwa shu mo. To jin c̱ithu/ ki o’d jin c̱inu ki me’d mo dhali jin c̱inu gom miinthus mo tani /e yisa ’theḵki gwo gom uni yisa.

⁷Yan’ko’d aha/ ki o gwo mo ki: Hili mo mo ma, aha/ p̱u’dkina mo. Eya warka/ jin ’kuc̱u/ is jin ’kwarkunu gwo ap̱o/ gom aha/ mo.

⁸Aha/ ’kunya bwa mo mmomii bwam pini mo, ayy Arumgimis pem. Gwoŋḵan pini jin c̱inu mo a’di di’d eya dum pem mo.

⁹Aha/ ṯorkina gwoŋ ’kunyga/ jin c̱inu gom mo jin ’cuḵuwa ’cuḵ mo eya dhana tul ’kup̱ mo. Dhali hili mo mo ma, aha/ dinaki mu’th ’twam pem mo, me’d jin mishkina /e aha/ mo, ayy Tap̱a.

¹⁰Aha/ dinaki bag mom pini jin tana /e aha/ is ki me’d mmowoṯẖ aha/ eya dum pem mo. Aha/ ṯorkina gwo mo goma isiŋ ganam pini jin tana /e mo dhali gom bway gi mowoṯẖ pini mo. Aha/ dinaki us mo/en pini jin ṯelu sho’k mo dhali mo ma isiŋ ganam pini jin tana /e mo. ’pena dhana tul ’kup̱ ’kwani mo.

¹¹Dhalku/ ki bu’th momiimiim pini ’peni aha/ mo, ayy Tap̱a. Dhalki mo/en pini jin ṯelu sho’k mo dhali mo ma isiŋ ganam pini jin tana /e mo tani ’tash aha/ ’twa/ ki sule/ sule/ mo.

¹²Haali/ tonthus uni ’kamki aha/ mo dhali uni molu deŋ e mo. Miinthus pem uni ḵalki aha/ ka ’cesh mo ntagi aha/ mola mo mo. Uni tana ris ka ris kun bolina mur ’kup̱ pem e mo. Adum pem ush aha/ me’di e mo.