GWAY GI IDAWUU’D 38:3-16

³Dhali moŋkamu/ mura shuman buŋgwar is pem is mowa? haala nyor pini jin shwana /e caaca mo. Dhali mowac̱a kamu/ di’d goma simam pema? gom miinthus pem mo be.

⁴Haali/ miinthus pem loski aha/ ki ’kup̱i lu/ mo, dhali uni ’thiraa/ diṯ mmoḵal mo be.

⁵Jamam pem ’kakin mo dhali bulabul mo dhali taga ’bi/ nycine/ mo gom miim p̱us pem mo.

⁶Aha/ kumkunu ’twa/a ’cesh mo dhali ’dac̱al ’ko’da ’cesh mo. Isa yempa/ yula tente/ mo tani aha/ yakina gwolu/ mo.

⁷Haali/ empa’d pem a’di ’tu’dkunu ki mo jin ’batha’ba’th mo, dhali moŋkamu/ mura shuman buŋgwar is pem is mowa?

⁸Aha/ kumkunu ’twa/a ’ceshi ’baar mo dhali sirica p̱o/ ki sho’k mo. Aha/ ohonkina mo goma dulaṯṯ ma nyor ma dum pem mo.

⁹Tap̱a, aris mom pem kun gwon ma du mo tani mishu ki /e mo. Dhali ashurem pem jin wuka/ mo tani ’konuki bag ’peni /e mo be.

¹⁰Adum pem shwa’d ki ju’k ju’k mo dhali mom’bi’th pem ushi me’d mo e aha/ mo dhali apinya/ em pem jin shwa’d ki o’d mo tani, uni si’da/ uskin ’peni aha/ mo be.

¹¹Imugum pem dhali uni gun nyaḵ aha/ ii ka yempa/ mo tani uni doshkin ki moŋḵo/ is ’peni isa nyor pem kun wo’cki aha/ she/ mo, dhala bas pem si’da/ uni doshkin isa dhana/ mo.

¹²Uni gwansan kun simmki mondiki/em pem e mo tani ’thikina gumem buni mo. Uni gwansan kun simmki mo e jin mina uni shi/ aha/ is mo tani oki gwo kun minu kup̱ mo dhali kulum gwo ibwa mmo’ce’da ’ce’d me’di isi yula tente/ mo.

¹³Hili aha/ wana e ki wathin ’diye/ mo, aha/ dinaki ciḵ toŋ kamu/ mo. Aha/ wana e ki wathi/ jin mol ’twa/ wal mo jin mol ’twam piti ḵa’d mo.

¹⁴Nye, aha/ wana e ki wathi/ jin mol gwo ciḵ mo, dhali e ’twa/ mo tani aha/ dara gi gwoŋ ḵucur mo.

¹⁵Hili e /e mo tani ayy Tap̱a, /e be ic̱orkaa/ mo be. A’di ta /e be, ayy Tap̱a Arumgimis pem, /e jin mini thoḵa thoḵ ’twa/ mo be.

¹⁶Haali/ aha/ ’thona mo ki: Uni mini dhalki bwa ki ’kuny ap̱o/ aha/ mo. uni gun dhu ’ba/ ki ca ap̱o/ aha/ mo ki sho’k pem yereski’d mo.