GWAY GI IDAWUU’D 37:3-18

³Gami gwo is e Tap̱a mo, dhali miiyi ki ’bore/ mo. Wakan ki /e mini c̱a’b eya ’cesh mo, dhali ’kuny bwa mo gom mo jin mina /e c̱a’b ki ’dantar mo.

⁴Budhi mo jin ’kunyu bwa e Tap̱a mo, dhali a’di midi c̱i /e to kun gwon ma dum pini mo.

⁵C̱uthi bway pini ’kup̱ ki Tap̱a mo. Dhali gami gwo is e a’di mo, dhali a’di midi ḵal mii mo be.

⁶Dhali a’di midi ḵal mom pini jin minu ye /e mo e moŋkush mo dhali tom ’boro’d pini mina e waki montee mo.

⁷Doshi naskina/ e bwambor gi Tap̱a mo dhali c̱oriya c̱or ki bwa jin ’kuc̱u/ ki ’kari’th gom a’di mo. Dhalku/ is ki anan ap̱o/ a’di jin gam mii adu is e bway piti mo, ap̱o/ wathi/ jin ḵali tonthus ka pije/ ki mii jin p̱ishina a’di ki ’pen mo.

⁸Daḵi ’pena nyor mo dhali dhalka nyor jin shwanu ’pen mo. Dhalku/ is pini ki anan mo, a’di jin ḵuthi is jasi gom tonthus mo.

⁹Haali/ amanmii tonthus mo tani a’di minu la ’ciṯẖ mo, hili uni gwansan kun c̱orki Tap̱a mo tani uni a’di imini gam mony’cesh mo.

¹⁰C̱ori naskina/ ari’ceenne/ mo dhali amanmii tonthus midi di doḵ/e yisa. Ba me’d jin hila um a’di ki a’di di’d e mom piti ki ’bore/ mo tani a’di midi di yisa.

¹¹Hili uni kun ’thup̱ ma du mini gam mony’cesh mo dhali ’kuny bwa e is buni mo e mo jin isha to ka enthus ki mii jin gama uni adu is mo.

¹²Amanmii tonthus a’di mii’da wu’th ap̱o/ a’diŋ ḵar/e mo dhali ’pe’d shem piti ap̱o/ a’di mo,

¹³hili Tap̱a p̱e’thki a’di jin mii tonthus mo haali/ a’di mishki’d ka teem piti p̱u’dki’d mo be.

¹⁴Imanmii tonthus uni buḵi gandal buni mo dhali gwana’da bwam buni mo, mmoḵal ka ’cesh uni kun hatha’ko’d mo dhali kun mini mii ta gi to mo. dhali ’kosh uni gwansan kun iin ki iin dhelelga/ mo.

¹⁵Gandal buni mini cic̱a dum buniŋ gana/ mo, dhali abwam buni minu ’ce’d bwa mo be.

¹⁶To kun tana a’diŋ ḵar/e ush’ceenne/ mo tani a’di ’boro’d mo mmobol to jin ishi’d ka enthus ma ris uni kun mii tonthus e mo.

¹⁷Haala bi gi imanmii tonthus mo tani uni minu ’ce’d mo, hili Tap̱a a’di dhuki imanmii miiŋḵar/e mo.

¹⁸Tap̱a a’di mishki’da tee gi uni kun ’kon ki dar gi mii ’ba/ mo, dhali mal buni c̱a’bki’d ki sule/ sule/ mo.