GWAY GI IDAWUU’D 37:12-38

¹²Amanmii tonthus a’di mii’da wu’th ap̱o/ a’diŋ ḵar/e mo dhali ’pe’d shem piti ap̱o/ a’di mo,

¹³hili Tap̱a p̱e’thki a’di jin mii tonthus mo haali/ a’di mishki’d ka teem piti p̱u’dki’d mo be.

¹⁴Imanmii tonthus uni buḵi gandal buni mo dhali gwana’da bwam buni mo, mmoḵal ka ’cesh uni kun hatha’ko’d mo dhali kun mini mii ta gi to mo. dhali ’kosh uni gwansan kun iin ki iin dhelelga/ mo.

¹⁵Gandal buni mini cic̱a dum buniŋ gana/ mo, dhali abwam buni minu ’ce’d bwa mo be.

¹⁶To kun tana a’diŋ ḵar/e ush’ceenne/ mo tani a’di ’boro’d mo mmobol to jin ishi’d ka enthus ma ris uni kun mii tonthus e mo.

¹⁷Haala bi gi imanmii tonthus mo tani uni minu ’ce’d mo, hili Tap̱a a’di dhuki imanmii miiŋḵar/e mo.

¹⁸Tap̱a a’di mishki’da tee gi uni kun ’kon ki dar gi mii ’ba/ mo, dhali mal buni c̱a’bki’d ki sule/ sule/ mo.

¹⁹Uni minu ’koki dhu ki mo ma ’the is ka tee kun ta thus ki thus mo, dhali ka tee jin mina ṯe/ ’kosh mo tani uni mini ta gi to jin ish ka enthus mo.

²⁰Hili imanmii tonthus mo tani uni ’ce’dki sho’k mo. Aris uni kun ta ’kup̱ gi Tap̱a mo tani uni wana e ki monyca ma shon dhii/i’d mo, uni kun la p̱uu mo – dhali uni kun wana e ka ku’d kun la p̱uu mo.

²¹Amanmii tonthus barki to ḵal ’peni ’kwani mo tani, dhali mol c̱iya murem piti ka nyaŋ’ko’d mo, hili a’diŋ ḵar/e ta’da ’the mo dhali c̱i’da c̱i mo.

²²Haali/ uni gwansan kun ’boru mii ki Tap̱a mo tani uni mini gam mony’cesh mo, hili uni gwansan kun jeenu ki a’di mo tani uni minu ’ciṯẖ ’twa/ mo be.

²³Ŋaṯgin jin tana wathi/ mo tani a’di ’peni Tap̱a mo, dhali a’di ṯelki a’di sho’k mo e bway jin mina bwa ’kuny a’di mo.

²⁴Ba ki a’di midi biṯ mo tani a’di minu ’koki biṯa sho ’kup̱ ka luŋgu’b mo, haali/ Tap̱a a’di ta mondim gom me’d piti mo.

²⁵Aha/ tana dhuru’c ’thissa/ mo dhali shwane/ aha/ tana dhan mo. Hili naskina/ aha/ dinaki p̱ar a’diŋ ḵar/e e dhalkunu ’pen mo walla uc̱im piti mmo’tho tonṯe/ mo.

²⁶A’di c̱iki to ka ’ka’d me’di is mo ka yempa/ mo dhali c̱i to mo, dhali uc̱im piti warkin ki uni kun ’bor mii mo.

²⁷Ḵwa/i bwa mo ’peni tonthus mo dhali miiyi ki ’bore/ mo, wakan ki /e mini di ki sule/ sule/ mo.

²⁸Haali/ Tap̱a a’di enki mo jin ’konuki miiya mii ka gwar ’de/ mo. A’di midi diki dhal unim piti kun dhunu ki she/ ki dhelel dhelel ’pen mo. Imanmii miiŋḵar/e minu dhu ki sule/ sule/ mo. Hili uc̱i gi imanmii tonthus mo tani uni minu ’ciṯẖ ’twa/ mo.

²⁹Imanmii miiŋḵar/e mini gam mony’cesh mo dhali c̱a’ba p̱o/ a’di ki sule/ sule/ mo.

³⁰’Twa/ ma manmii miiŋḵar/e mo tani a’di bahki gwo gom moyuḵ mo dhali ale’d oki gwo ki dar gi mii ma gwar ’de/ mo.

³¹Dhali gwoŋḵan ma Arumgimis piti jin c̱inu mo tani a’di di’da dum piti mo. Dhali ŋaṯgin piti ’koki yeresa/ yeres mo.

³²Amanmii tonthus a’di timki a’diŋ ḵar/e mo dhali simm a’di e mo mmo’kosh mo.

³³Tap̱a a’di midi diki dhal a’di ’pen e mom’bi’th piti mo, walla dhal a’di ki a’di minu waḵ mo me’d jin minu sus a’di e mondwall gwo mo.

³⁴C̱ori Tap̱a mo dhali kari bway piti mo dhali a’di midi kar /e ki ca mo mmogam mal gi mony’cesh mo. /E mini hil mony’ce’d sho’k ma manmii tonthus mo.

³⁵Aha/ hilkina manmii tonthus mo mmomii mii gi ’ba/ mo, dhali mmotura tur me’da bwanyayiis gi Pan Lubnaan mo.

³⁶Doḵ/e aha/ yakina ki yam pe mo dhali hili a’di diki di doḵ/e mo. Ba aha/ ŋap̱kina a’di mo tani a’di ’konuki gam mo be.

³⁷’Cunycuri wathi/ jin dar gi mii ’ba/ mo dhali hili mo mo ma a’di jin dhelel ma du mo, haali/ emen ’kon gom wathi/ gi moŋḵu’th is mo.

³⁸Hili imandhaŋ gwo mo tani uni minu ’ce’d sho’k imonṯal ’de/ mo. Dhali emen gi imanmii tonthus mo tani uni minu ’ciṯẖ mo be.