GWAY GI IDAWUU’D 25:2-14

²Ayy Arumgimis pem e /e mo tani aha/ gamkina gwo is mo. Dhalku/ ki dhal aha/ ki aha/ minu kar ki mo ma ’the is mo. Dhalku/ ki dhal ris uni kun ta ’kup̱ ki aha/ mmoyuḵ gway ki moŋ’kuny bwa ap̱o/ aha/ mo.

³Nye, dhalki jan ṯal ’de/ jin c̱or /e ki kar ki mo ma ’the is mo ma. Dhalki uni dhunu ki mo ma ’the is mo, uni gwansan gun ’dap̱a e ki mii ma ’bar ’bar mo.

⁴Kari aha/ mmomish bway pini mo ma, ayy Tap̱a. Ṯori /e aha/ bway tur pini mo.

⁵Shuyi aha/ bway e gwoŋ ganam pini mo, dhali ṯori aha/ gwo mo, haali/ /e tana Arumgimis gi bway gi mowoṯẖ pem mo, haali/ aha/ c̱orkina /e ka tee ’baar mo isa yempa/ mo.

⁶Kayi momiimiim pini e mo, ayy Tap̱a, dhali mo/en pini jin ṯelu sho’k mo, haali/ uni ’kokin ’peni kadhamo/ mo.

⁷Dhalku/ ki ka miinthus pem e kun miiga/ ki aha/ tana dhuru’c mo, walla ris gwon dhaŋ pem mo, isi ki gwo ki mo/en pini jin ṯelu sho’k mo tani kayi aha/ e mo, gom gway gi miim ’borgam pini mo, ayy Tap̱a.

⁸Tap̱a a’di ’boro’d dhali ta jaŋ ḵar/e mo. Dhali gom gwo gi wakan mo tani a’di ki ye’th imanmii miinthus sho’k e bway ’boro’d mo.

⁹A’di ki shuwa shu/um bway gom uni gun dhu is ki gwa’d e a’di jin ’boro’d mo, dhali ṯor imandhu is ki gwa’d bway piti mo.

¹⁰Aris bway tur gi Tap̱a mo tani uni ṯelu sho’k e mo/en mo dhala ris mii ma isiŋ gana/ mo, gom uni gwansan gun dhu gwom piti kun gamu me’d mo dhali gwonyc̱im piti gun c̱ina a’di mo.

¹¹Gom gway gi gway pini mo tani ayy Tap̱a, dhalki miim pem jin dika/ i’ba/ ’pen mo ma, haali/ a’di caaca mo.

¹²Ki wathi/ ja iḵo/ki Tap̱a mo? A’di imina a’di ye’th sho’k mo i bway jin mina a’di ikwany mo.

¹³A’di ki is piti midi c̱a’b e mo jin isha to ka enthus mo, dhali uc̱im piti mini gam mal gi mony’cesh mo be.

¹⁴Mo jin nyaḵu to mii ki Tap̱a mo tani a’di gom uni gwansan gun ḵo/ki a’di mo, dhali a’di ṯorki’d eya tente/ e uni gwom piti jin gamu me’d mo.