GWAY GI IDAWUU’D 25:11-22

¹¹Gom gway gi gway pini mo tani ayy Tap̱a, dhalki miim pem jin dika/ i’ba/ ’pen mo ma, haali/ a’di caaca mo.

¹²Ki wathi/ ja iḵo/ki Tap̱a mo? A’di imina a’di ye’th sho’k mo i bway jin mina a’di ikwany mo.

¹³A’di ki is piti midi c̱a’b e mo jin isha to ka enthus mo, dhali uc̱im piti mini gam mal gi mony’cesh mo be.

¹⁴Mo jin nyaḵu to mii ki Tap̱a mo tani a’di gom uni gwansan gun ḵo/ki a’di mo, dhali a’di ṯorki’d eya tente/ e uni gwom piti jin gamu me’d mo.

¹⁵Em pem isa yempa/ c̱u’thki ’kup̱ki Tap̱a mo, haali/ a’di midi buḵ sho’k pem ’pena gume/ mo.

¹⁶Ṯuki /e e aha/ mo dhali miiyi mii ma ’the e aha/ mo, haali/ aha/ dina aha/ ’de/ dhali ṯocu bwa mo.

¹⁷’Cuḵi aha/ ’peni mo ma ṯo’c bwa ma dum pem mo ma, dhali susi aha/ ka pije/ ’peni mo ma c̱is pem mo.

¹⁸Hili isi gwo e gom monṯo’c bwam pem mo dhali gom mo ma du mur pem mo, dhali gwami aha/ ’pena ris miinthus pemi ’baar mo.

¹⁹Hili isi gwo e ma haali/ ’kup̱ pem ŋala/ wana risa! Dhali ki mombujur jin shinuwa shi/i e mo tani uni shi/ki aha/ i e mo be.

²⁰Ayy jiyi mondiki/em pem mo dhali ’cuḵi aha/ mo. Dhalku/ ki dhal aha/ bway ki aha/ minu kar ki mo ma ’the is mo, haali/ aha/ budha mo jin hurga/ jwa e /e mo.

²¹Dhalki mii jin miinu ki dar gi ŋadhum dhali miiŋḵar/e uni ’tash aha/ ’twa/ mo, haali/ aha/ c̱orkina c̱or gom /e mo.

²²Wani ’Kwani ma Israyiil ’ba/ mo ma, ayy Arumgimis, ’pena ris monṯo’c bwam buni mo.