GWAY GI IDAWUU’D 22:11-30

¹¹Dhalku/ ki si’d ’peni aha/ kan mo ma, haali/ monṯo’c bwa uni ’disha’dish mo dhali wathiŋ kamu/ p̱iyi’d mmowoṯẖa woṯẖ mo be.

¹²Aris gwaṯẖim bip̱ uni ’kamki aha/ mo, gwaṯẖim bip̱ gun ’bitha’bi’th ’peni Pam Bashan mo tani uni ’kamki aha/ mo.

¹³Uni c̱eeki aha/ ’twam buni i is mo mmowa e ka dhop̱ kun pithilki to ki she/ mo dhali ko mo.

¹⁴Aha/ wana ’baar mo me’d yi’de/, dhala risa simam pemi ’baar raḵkin mo ’peni gwocor mo. Adum pem ta walmish ki walmish mo, a’di ṯo’do’d mo eya bor pem mo.

¹⁵Mom’bi’th pem a’di ḵu’thki’d me’da ’pish mo, dhala le’d pem a’di ’dap̱ki’d e bwaŋ ḵa’dkim pem mo. /E ’thiki aha/ ’ko’d e bu’da ’cesh ki mowu mo.

¹⁶Nye, arisa ’ka uni ’kamki aha/ mo. Imanŋali ’pen kun mii tonthus mo tani uni hamki aha/ mo. Uni su’kki me’d pem dhali sho’k pem mo.

¹⁷Aha/ misha deŋa risa simam pem e mo – Uni hilki aha/ ka ’thime/ mmoḵo’c e i is mo dhali p̱e’th ki ḵuss ḵuss ap̱o/ aha/ mo.

¹⁸Uni pwaḵki burrinyem pem bwa mo e bwaman is buni mo, dhali gom burrinyem bwaman pem mo tani uni biṯki to gom aha/ mo.

¹⁹Hili /e, ayy Tap̱a, dhalku/ ki si’d mo ma. Ayy /e jin ta mowoṯẖ pem mo, huru/ ki jahanne/ gom mowoṯẖ pem mo.

²⁰’Cuḵa ḵashiram pem ’pena ris gandal gun kaaka mo ma, dhali mondiki/em pem ’peni mom’bi’th ma ’ka mo.

²¹Tayi aha/ is ki me’d ’peni ’twa/ ma dhop̱ mo ma, aḵashiram pem wa’thkunu i e ki ce ma morbip̱ gun shwana nyor ka nyor mo.

²²Aha/ mina ṯor gway pini e iwaḵ pem mo. E bwaman ma dhana tul ’kup̱ ’kwani mo tani aha/ mina maŋ /e mo be.

²³Um gun ḵo/ki Tap̱a mo tani maŋi a’di mo ma, aris um gun ta iya/ ma Yakuub mo tani kari a’di ki ca mo ma, dhali doshi ki moŋḵo/ is gom a’di mo, aris um gun ta iya/ ma Israyiil mo.

²⁴Haali/ a’di diki waḵa waḵ mo dhali shi/a shi/ i e mo gom monṯo’c bwa jin ṯoci wathi/ bwa mo. Dhali a’di diki bag jis/em piti ’peni wathi/ mo, hili a’di ciḵki ko mo me’d jin gwokina wathi/ ’twa/ i a’di mo.

²⁵’Peni /e mo tani a’di p̱u’dkina mom pem jin maŋka/ /e eya dhana tul ’kup̱ ki ’kwani mo, aris gwom pem kun oka/ is mo tani aha/ mina c̱i uni ibwambori uni gwansan kun ḵo/ki a’di mo.

²⁶Wathi/ jin ṯo’ckunu bwa mo tani a’di midi shwa tonṯe/ mo tani dhali minu kap̱ mo, Dhali uni gwansan kun simmki a’di e mo tani uni mini maŋ Tap̱a mo. Dhalka dum bum ’kon ki sule/ sule/ ya ye ’ba/ mo.

²⁷Aris uni kun ’kokin isi ’pemen gi mony’ceshi ’baar mo tani uni a’di imini ka a’di e mo dhali ṯu’k e Tap̱a mo, dhala risa waḵ gi kal gi ’kwaniny’cesh mini luŋ ibwambori a’di mo.

²⁸Haali/ mo jin tanu tap̱a a’di cila Tap̱a mo, dhali a’di ki jiya ris kal gi ’kwaniny’cesh mo.

²⁹Nye, e a’di aris ’kwani kun dhu ’ba/ ki ca e mony’cesh mo tani mini dhu shush ka luŋgu’b mo. Ibwambori a’di mo tani uni mini luŋ mo, uni gun mini ii ka ’cesh mmowa e ki bu’da ’cesh mo, dhali a’di jin mol is piti kar ki e mo.

³⁰Aris uni gun mini iiyu/ i’ko’d mo tani uni a’di imini mii a’di to mo. Dhali ’kwani mini ṯor gwo gom Tap̱a goma nyaḵum yil gi uc̱i gun mini p̱u’du/ i’ko’d mo.