GWAY GI IDAWUU’D 18:2-27

²Tap̱a a’di ta wosh pem mo, dhali acur pem mo, dhali aman’cuḵ aha/ mo, dhali Arumgimis pem mo, dhali wosh pem mo, e a’di jin bu’thkika/ mo jin hurga/ jwa mo, a’di jin ta’da goŋgorom pem mo, dhali ce gi bway gi mowoṯẖ pem mo, dhali mo ma cur pem jin ṯenu gwo mo.

³Aha/ yuḵkina Tap̱a mo, a’di jin haki me’d mo jin minu maŋ mo, dhali aha/ takunu is ki me’d mo ’pena ris unim pem kun ta ’kup̱ ki aha/ mo.

⁴Atomm gi mowu a’di ’tamkunu aha/ is mo, mii jin kar ’kus me’d yi’de/ ’peni mo jin daḵu/ gwo me’d mo a’di tiḵ aha/ e mo,

⁵dhali atomm ma Haawiya a’di koṯẖki aha/ is mo, dhali agume/ gi mowu a’di jemki aha/ ’kup̱ mo.

⁶E mo ma c̱is pem mo tani aha/ yuḵkina Tap̱a mo, eya Arumgimis pem mo tani aha/ gwokina ’twa/i a’di gom mowoṯẖ mo. ’Peni gu’b gi mondheleladhelel piti mo tani a’di ciḵki ’twam pem mo, dhali kom pem a’di jidhirki’d mo e bwany’cem piti mo.

⁷Dhali mony’cesh a’di yaki’d ka kul is mo dhali ṯu’k ’ban ki washar washar mo, dhali moŋḵa’b ma ris wosha turga/ si’da/ uni deekin ki bir bir mo, dhali yiḵinki is mo haali/ a’di shwaki’da nyor mo.

⁸Aku’d yaki’d ka pije/ ’peni shush piti mo dhali o’d jin midi kup̱a kup̱ ’peni ’twam piti mo, akap̱any o’d jin ḵakaca ḵaka’c gac̱ki’d ka pije/ ’peni a’di mo.

⁹A’di goŋki momis is mo dhali thulu/ ka ’cesh mo dhala raḵ jin ’ceṯẖki’da ’tum a’di di’d e bwaŋ’kwariny sho’k piti mo.

¹⁰A’di merki’da p̱owa man’doyu gwo mo dhali p̱e mo, a’di p̱u’dki’d ki ’ta’b ap̱owa bi gi ’tham mo.

¹¹A’di karki mondhurumi’d mmota tom piti jin ’kamki a’di is mo, adarha’dam piti a’di ta’da raḵ jin ’ceṯẖki’da ’tum gom yi’de/ mo.

¹²’Peni moŋkush jin kushi mo kagahara e bwambori a’di mo tani to p̱u’dki’d ’pena raḵ piti mo jin ta’da wasa/ mo dhali akap̱any o’d mo.

¹³Dhali Tap̱a si’da/ a’di gwoki’da gur gur e momis mo dhali a’di jin Caa e ki Ca a’di bahki ’twam piti mo, awasa/ mo dhali akap̱any o’d mo.

¹⁴Dhali a’di shinki’da thop̱am piti mo dhali c̱e uni bwa mo dhali a’di ki dhi’th mo ka war mo dhali ṯi’k uni ’pen mo.

¹⁵Dhali bway tur e ḵumma/ yi’de/ mo tani uni ’kokunu mo mmomish mo, dhali moŋḵa’b gi mony’cesh uni mishkunu mo be, gom miiŋ ḵucur pini mo jin ḵucurkina /eya ḵucur mo, ayy Tap̱a, gom du’d gi shi/in ’peni shush pini mo.

¹⁶A’di jidhirki’d ’peni mo jin eḵa/ eḵ mo, dhali a’di bu’thki aha/ mo, a’di ki dir aha/ ka pije/ ’pena ris yi’de/ mo.

¹⁷A’di ki ’cuḵ aha/ mo ’peni a’di jin ta ’kup̱ ki aha/ jin ’bitha’bi’th mo, dhali ’peni uni gwansan kun shi/ki aha/ i e mo, haali/ uni ’kona isi ’bitha gom aha/ mo.

¹⁸Uni p̱u’dkina p̱o/ aha/ ka teem pem jin ta joḵ ki joḵ mo, hili Tap̱a a’di ta mohal pem mo,

¹⁹A’di ki buḵ aha/ ka pije/ e mo jin ḵwashara/ ḵwashar mo dhali a’di ’cuḵki aha/ mo, haali/ a’di ’borkina bwa ki ’bor ki aha/ mo.

²⁰Tap̱a a’di c̱iki aha/ adum pem jin ish ḵumma/ mo me’d isi mii ma ḵar/em pem mo, dhali me’d isi mii jin dhelelkika/ me’d pem mo tani a’di raḵki aha/ to ibway mo.

²¹Haali/ aha/ dhukina bway gi Tap̱a mo dhali aha/ dinaki mii tonthus mmoper mo ’peni bway ma Arumgimis pem mo.

²²Haali/ aris gwoŋḵan piti kun onu mo tani uni ’koni bwambori aha/ mo, dhali gwoŋḵan piti kun bahu mo tani aha/ dinaki dhu uni ’pen ka pije/ ’peni aha/ mo.

²³Aha/ dara gi mii ’ba/ ibwambori a’di mo, dhali aha/ karkina is pem ’peni mo jin ’konu ki mii ’ba/ mo.

²⁴Gom gwo gi wakan mo tani Tap̱a a’di iraḵki aha/ to ibway mo isi ki mii ma ḵar/em pem mo, dhali isi ki me’d pem jin dhelelkika/ mo e jis/em piti mo be.

²⁵Gom uni kun ta ku isiŋ gana/ mo tani /e ki ṯor is pini jin tana /e a/isiŋ gana/ e uni mo, dhali ki wathi/ jin dar gi mii ’ba/ mo tani /e ki ṯor is pini jin dara /e ki mii ’ba/ e wathi/ mo.

²⁶Dhali gom uni kun dhelelkin mo tani /e ki ṯor is pini jin dhelelkina /e e uni mo, dhali ki uni kun wanycarkina ii ki wanyjar mo tani /e ki ṯor is pini e uni ki c̱a’ckon mo.

²⁷Haali/ /e ’cuḵki ’kwani kun dhu is ki gwa’d mo, hili uni kun dhu ’bam buni ki ca ki e ma waḵ mo tani /e mini thul uni ka ’cesh mo be.