GWAY GI IDAWUU’D 16:2-10

²Aha/ ki o Tap̱a gwo mo ki: /E ta Tap̱am pem mo. Ki dar gi /e mo tani aha/ mina mol tom ’boro’d gam mo.

³Me’d uni gun dhunu ki she/ ki dhelel dhelel e mony’cesh mo tani uni a’di ita kun bol tiya e ki ’bor mo, dhali e uni mo tani a’di ’kunyka/ bwam pemi ’baar mo.

⁴Uni gwansan kun kwanykina ruma tiya mo tani uni marki mondiṯ bwam buni is mo, mon tom buni gun c̱ina uni mmo’ciṯẖa basa ’cesh mo tani aha/ mina diki c̱i mo walla aha/ mina diki ḵal gway buni e ’twam pem mo.

⁵Tap̱a a’di ta tom pem jin kwanyka/ mmobu’th mo dhala ḵubbaayam pem mo dhali /e ko’dki mal pem is mo.

⁶Jil uni dirkini bwambori aha/ mo e mo jin ’kunyka/ bwa mo, nye, aha/ tana gi mala ’borga/ mo.

⁷Aha/ ’bora Tap̱a mii mo a’di jin c̱iki aha/ gwo logom mo, e mon’thiny si’da/ mo tani adum pem ye’thki aha/ sho’k ki gwo mo.

⁸Aha/ karkina Tap̱a isa yempa/ ibwambori jis/em pem mo, haali/ a’di di’d ki me’da bim poros pem mo ki aha/ minu ’koki joc̱ mo be.

⁹Wakan adum pem a’di ’borkunu bwa mo dhala ḵashiram pem a’di ’kunykina bwa mo. Buŋgwar is pem a’di c̱a’bki’d ki c̱a’b ’pempaŋ gana/ mo.

¹⁰Haali/ /e diki c̱i aha/ eya Haawiya mo, walla /e diki dhal a’din ’de/ jin ta’da gayiin pini bway mo mmop̱ar jisa ’kulga/ e mo.