GWAY GI IDAWUU’D 147:3-20

³A’di ki wac̱ uni gun ’ce’dkunuwa du mo dhali is jamam buni kun ’koshkunu uni mo.

⁴A’di ki kar gwo mmota ŋulla/ mo gom gwo mmodeŋa cul e mo. A’di ki c̱iya cul gway buni ki she/ ki she/ mo.

⁵Tap̱am bana a’di icaaca mo dhali mom’bi’th piti ishi’d ka enthus mo. Mo jin mishu gwo ’ban jin ta jim piti mo tani a’di idiki’d ibwamp̱o/ mo jin molu bar a’di mo.

⁶Tap̱a a’di ki ’de’k uni gun yap̱kunu ki sho’k mo. A’di ki tor uni ’ko’da ’cesh uni gun ta thus ki thus mo.

⁷Yuḵi gway e Tap̱a mo jin ’boruwa ’bor bwa i is mo. Lugumi gway eya Arumgimis bana ka dheŋdhenye/ jin ’kon ma shu/i pesu/ mo.

⁸A’di ki kum momis ka raḵ mo, dhali a’di ki thosona sho’k mmohetha p̱o/ mony’cesh mo, dhali a’di ki raḵa sho mmoca mo ap̱owa ris wosh mo.

⁹A’di ki c̱i to/e tonṯem buni mmoshwa mo dhali ki usha waraŋgwaḵ kun gwokin mo.

¹⁰Bwaŋ ’kunyu’d piti yisa di’d e shumarum kun ’bitha’bi’th mo, walla bwaŋ ’kunyu’d piti yisa di’d e ’basho’k gi wathi/ mo.

¹¹Hili Tap̱a a’di ki bu’th mo jin ’boru bwa mo e uni gwansan kun ḵo/ki a’di mo, dhali e uni gwansan kun tan ga ’teŋ kap̱e/ e mo/en piti jin ṯelu sho’k mo.

¹²Maŋi Tap̱a mo, ayy Urushaliim. Maŋi Arumgimis pini mo, ayy Sihyuun.

¹³Haali/ a’di ’bi’thki’da bem’ban gi toŋḵuthu’d jin miinu ’twaŋkala goŋ pini mo. A’di ’borki iya/m bum mii e bwaman um mo.

¹⁴A’di karki moŋḵu’th is e bwaŋgwayum bum mo. A’di ’tu’dki um bwa ka dip̱any pos bunyan jin thebera/ e ki theber mo.

¹⁵A’di hashki gwo jin ḵana a’diya ḵan e mony’cesh mo. Gwom piti guski’d ki shaw shaw mo.

¹⁶A’di ki c̱iya wasa/ mmo/isha ’cesh me’da mur ḵa’bala bany bany mo. A’di ki ḵwa/a wasanyjap̱e/ bwa me’d ’piny mo.

¹⁷A’di ki ṯaka wasam piti ka ’cesh me’d ushi ḵuluny to mo. Kaja a’di imidi doshi bwambor mon’thup̱ piti jin ’thup̱a a’di mo?

¹⁸A’di hashki gwom piti mo dhali wa uni mo. A’di ki kar ’tham piti mo mmoposh mo dhali yi’de/ yakina ŋwac̱a/ mo.

¹⁹A’di ki bah gwom piti eya Yakuub mo a’di jin ta gwoŋḵan piti kun bahu mo dhali gwoŋḵan kun onu eya Israyiil mo.

²⁰Kal gi ’kwanin tiya dina a’di ki ṯu/ul ki mii gi wakan mo. Uni ’koki mish gwoŋḵan piti kun onu mo. Maŋi Tap̱a mo.