GWAY GI IDAWUU’D 139:4-20

⁴Isi kan si’dayi /e mishki gwo kun ’koni ’twam pemi ṯwa/a/ mo, hili mo mo ma, ayy Tap̱a, /e mishki uni ’baar mo imonṯal ’de/ mo.

⁵/E ṯu’bki aha/ ibwamp̱o/ mo dhali ibwambor mo, dhali /e kari me’d pini ap̱o/ aha/ mo.

⁶Dhan mo jin mishu gwo ’ban a’di ita jaro/ gom aha/ mo. A’di ḵa’dama/ ḵa’dam mo. Aha/ mola a’di gamm mo.

⁷Ki mana imiga/ ya ’peni /e ki dar gi Shi/in pini mo? Walla ki mana imiga/ gus ’peni /e ki dar gi buŋ’kus pini mo?

⁸Waḵki/ aha/ shinkunu bway momis mo tani /e dikin imun mo. Waḵki/ aha/ mina ta ga ci e mo jin ’kona ’kwani kun wun mo tani /e dikin imun mo.

⁹Waḵki/ aha/ mina bu’th ya ma bi ma tente/ mon’thamo/ mo dhali e mo gi bwaagap̱ gi ḵumma/ yi’de/ ’baar mo

¹⁰isi kani me’d pini shuki aha/ bway mo dhali me’da bim poros pini bu’thki aha/ mo.

¹¹Waḵki/ aha/ mina o gwo mo ki: Dhalki mondhurumi’d ’kam aha/ is mo dhali dhalki moŋkush wara’d ki mon’thiny gom aha/ mo,

¹²isi kan mondhurumi’d diki ta mondhurumi’d gom /e mo. Mon’thiny a’di c̱a’bki bany bany me’d montee mo haali/ mondhurumi’d a’di wara’d ki moŋkush gom /e mo.

¹³Haali/ /e uḵkina aris to gi bwaman is pem mo, /e shoki aha/ ki ’be’b ’be’b e bwama dho’th ma ta’dam pem mo.

¹⁴Aha/ maŋkina /e mo haali/ /e a’di ḵogu mo dhali /e tana manmii to mer mo. To mer uni ta miim pini mo. /E mishki aha/ ki mish gana/ mo.

¹⁵Ayica yir pem a’di molu bag ’peni /e mo, ki aha/ ’konu mmo/uḵ ki kup̱ mo, ki koṯẖ jin wagaskunu a’di e mony’cesha ’kulga/ mo.

¹⁶Em pini mishki bul pem nṯwa/a/ gom uḵ pem ki aha/ tana ari ’dii mo. Ka tee kun ’kawurkunu gom aha/ mo tani a’di ’kwarkunu eya warkam pini mo, aris uni ’baar mo, me’d jin ’kona uni ki ’ko mo naskina/ mo.

¹⁷Gwom pini kun kuluma /e bwa gom aha/ mo wani yinthowa, ayy Arumgimis. Ḵwashar buni ’ka’da miiya?

¹⁸Waḵki/ aha/ mina deŋ uni e mo tani uni bolkina si’b gi bwaagap̱ e ka ris mo. Ki aha/ merkina e mo tani aha/ dina nyaḵki /e mo naskina/.

¹⁹Ayy /e jin mini ’taki ’kosh uni kun mii tonthus moyi, ayy Arumgimis, dhali ki ’kwani kun wol ’kwaniya bas mo mini ’taki ḵwa/ is buni bwa ’peni aha/ mo,

²⁰ki ’kwani kun dup̱i /e i e mmo/ush /e gwo ki ’tash mo, uni kun cukin ki is buni imonṯal ’de/ ap̱o/ /e gom tonthus mo.