Gutut 15:28-41

²⁸God Guewa Woup Seniwa nu den imunu daiton gapan, iup itan mega da e oneyap ya seapen menan anutoni, go nop mame megenat ayamase tapen,

²⁹Waenapan nanimup god eboewa guewa kaitane, ameme antaba irine god muga munapen ame tabaewa ya nane. Amba man deniwa ya nane. Amba man mege wat imokaminewa ya nane. Amba waen ge apan wainan gogo ya tane. Koewa mame iragi ya taiwaniampinawa ame e kakae di tai. Nop otu nuga mame uon tan. Gaun inayap waianit. Mu ok ap anega watu enan.

³⁰Oit wat amone nagire pa Antiok tauane. Amba Antiok Iesu dugup mega nagirewa ok ame munan.

³¹Dadak nopewa ame ok gwanap wane waenapan iravi nop bibigawa anune aton baware tan.

³²Diudes ge Sailas mu den God oise wainewa, menan tase gwani dadak munep aritavet amun imumu to kimepen menan wam nononga wadidiamon wanumun.

³³Wam nononga wanumone amba pa Antiok Iesu dugup mega nagirewa baigane den watu enamone ewagai Ierusalem sia amon.

³⁴Go apan Sailas ya aet anuni menan ap mepe wanden.

³⁵Amba Pol ge Banabas pa Antiok gapan di wanumon, ap mepe mu upinamu aruga den ayop nopewa gapan di wadidiam wanumun.

³⁶Wam da Pol Banabas anega wadien, “Pa sewa sewa daio nu namu ane wadidiamotoni mu anenen taiwanumune anupen menan ewagai sia daio inamup ane yawamopen.”

³⁷Banabas apan Dion Mak den aet anun.

³⁸Go Pol Dion Mak ya aet anun iwa wata pa Pampilia tauane gapan me yone ae vemo ewagai pa Antiok aeni menan.

³⁹Ame menan Pol ge Banabas Dion Mak aigap noyam notatae warane amba dum marimen amon. Banabas Dion Mak den kabum gagap at Saiparas amon.

⁴⁰Amba Pol apan Sailas om enu. Amba Antiok Iesu dugup mega nagirewa Pol ge Sailas munan mup wane, God kwayupe gapan wat aipakam mumane amba Pol ge Sailas tau amon.

⁴¹Amone at Siria ge Silisia tau ge tau amone, Iesu dugup megawa wadidiamone anun imumu wat kaimagamepen aroewa muniwanumun.