Gutut 15:22-30

²²Ap menan Iesu watu enamot mega nagirewa, dugup kwayup tamuine nagirewa amba Iesu anu tumasine nagirewa iragi den nop panane apan mugawa wa watu enamop, Pol ge Banabas tanamo pa Antiok amot wan. Ap wane apan Diudes, yaua da Basabas amba apan Sailas mu den watu enamon. Iesu anu tumat nagirewa apan dere mame virimu tainewa.

²³Mu den ok manega watu enan, Kaewa kaewa tatan gwaninua ian ugupe Iesu anut tumasiana nagirewa, pa Antiok, Siria amba at Silisia gapan iniwanin. Nu Iesu watu enamot megawa amba Ierusalem dugup mega, kwayup taintoni nagirewa den gaun inayap waivin.

²⁴Nu anuton apan ame upi mapa inanup tau onamone aro da ya munaton, amba am dauro taen, opata muga wane iae guine wa koeamene.

²⁵Ap menan nu iragi iametoni amba imunu daiton manega anuton. Apan dere nu potanup watu enamoton. Apan dere, ame evenan wainu kakaewa, ame Banabas ge Pol, tanam inayap onamot waton.

²⁶Banabas ge Pol, nu ayop nuga Iesu menan, nao taine ge bop tawa ya anuine, apane waiwa.

²⁷Potanup amuine apan dere ame Diudes ge Sailas, mu nu dim da ok gapan seatoniwa nop gapan, sia aigap di wadiain.

²⁸God Guewa Woup Seniwa nu den imunu daiton gapan, iup itan mega da e oneyap ya seapen menan anutoni, go nop mame megenat ayamase tapen,

²⁹Waenapan nanimup god eboewa guewa kaitane, ameme antaba irine god muga munapen ame tabaewa ya nane. Amba man deniwa ya nane. Amba man mege wat imokaminewa ya nane. Amba waen ge apan wainan gogo ya tane. Koewa mame iragi ya taiwaniampinawa ame e kakae di tai. Nop otu nuga mame uon tan. Gaun inayap waianit. Mu ok ap anega watu enan.

³⁰Oit wat amone nagire pa Antiok tauane. Amba Antiok Iesu dugup mega nagirewa ok ame munan.