Gutpela Sindaun 8:17-30

¹⁷Na wanem ol manmeri i wok strong long painim mi, bai ol i lukim mi. Wanem ol manmeri i laikim mi, mi tu mi laikim ol tumas.

¹⁸Mi inap givim biknem na planti mani samting long ol manmeri. Na mi inap helpim ol long bihainim stretpela pasin na long kisim ol gutpela gutpela samting.

¹⁹Ol samting mi save givim ol i winim tru gutpela gol na gutpela silva.

²⁰Oltaim mi save bihainim stretpela pasin tasol.

²¹Mi save hipim planti gutpela samting long ol bakstua bilong ol man i laikim mi tumas. Na ol bakstua bilong ol i pulap tru.

²²“Bipo bipo tru, long taim Bikpela i laik wokim ol samting, em i wokim mi pastaim. Na bihain em i wokim olgeta arapela samting.

²³Bipo tru, long taim Bikpela i no wokim graun yet, em i wokim mi na mi stap.

²⁴Mi kamap long taim Bikpela i no bin wokim solwara na ol wara nabaut,

²⁵na long taim em i no bin wokim ol bikpela na liklik maunten.

²⁶Long taim mi kamap, Bikpela i no bin wokim olgeta hap graun, olsem na i no gat ol gaden samting i stap.

²⁷Mi stap wantaim Bikpela long taim em i wokim skai i raunim solwara

²⁸na long taim em i putim ol klaut long skai na long taim em i mekim wara i sut i kam antap long graun na pulimapim graun na i kamap bikpela solwara.

²⁹Na mi stap wantaim em long taim em i makim ol arere bilong solwara na i tok strong long solwara i no ken kalapim mak na long taim em i bin makim ples bilong putim dispela graun i stap long en.

³⁰Long taim Bikpela i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim. Mi bin amamas long lukim dispela graun na ol manmeri i stap long en, olsem na mi bin amamas i stap oltaim long ai bilong Bikpela.”