Gutpela Sindaun 8:1-14

¹Gutpela na stretpela tingting i olsem wanpela meri i sanap na singautim yumi.

²Em i sanap long ples maunten klostu long rot na long ol rot bung.

³Na em i sanap klostu long ol dua bilong bikpela banis bilong taun, na i wok long singaut olsem,

⁴“Mi singaut long yupela olgeta manmeri.

⁵Yupela man i no gat save, yupela kam na kisim save. Yupela man i no gat tingting, yupela kisim gutpela tingting.

⁶Putim yau gut long gutpela na stretpela tok mi laik givim yupela.

⁷Oltaim mi save autim tok i tru tasol, na mi no laik tru long olkain tok nogut.

⁸Olgeta tok bilong mi i stretpela tasol. Mi no inap mekim wanpela tok giaman.

⁹As bilong dispela tok i klia tumas long man i gat gutpela tingting na save, na ol i save dispela tok i stret olgeta.

¹⁰Yupela i mas larim mi i skulim yupela long gutpela save, long wanem, tok bilong mi i winim gutpela silva na gol.

¹¹“Mi yet mi gutpela na stretpela tingting na mi winim tru olkain ston i dia tumas na olgeta samting yupela i save laikim.

¹²Na mi save long ol gutpela pasin bilong wokabaut. Mi gat olgeta save na mi inap skelim olgeta samting.

¹³Man i save aninit long Bikpela, em i no save laikim tru ol pasin nogut. Mi no laik tru long pasin bilong bikhet na pasin bilong man i litimapim nem bilong em yet na pasin bilong mekim olkain samting nogut na pasin bilong tok giaman.

¹⁴Mi inap givim gutpela tingting long ol manmeri na mi inap helpim ol long mekim gutpela wok. Mi yet mi gutpela tingting na mi gat bikpela strong.