Gutpela Sindaun 6:16-35

¹⁶Bikpela i no laikim tru ol man i mekim dispela 7-pela pasin.

¹⁷Pasin bilong hambak na lukim ol arapela man i olsem samting nating. Pasin bilong mekim tok giaman. Pasin bilong kilim nating ol arapela man.

¹⁸Pasin bilong tingting long mekim pasin nogut. Pasin bilong hariap long mekim sin.

¹⁹Pasin bilong tok giaman long kot. Pasin bilong mekim ol man i bel nogut long ol brata bilong ol yet.

²⁰Pikinini, yu mas harim tok bilong papamama bilong yu na yu no ken sakim tok bilong tupela.

²¹Yu mas putim tok bilong tupela long tingting bilong yu na bihainim gut oltaim, na em bai i kamap olsem gutpela bilas long het na long nek bilong yu.

²²Long taim yu wokabaut, dispela tok bai i soim rot long yu. Na long taim yu slip, bai dispela tok i was long yu. Na long taim yu kirap, bai dispela tok i givim gutpela tingting long yu.

²³Tok bilong papamama i olsem wanpela lam i lait gutpela bilong soim rot long yu. Na taim tupela i stretim yu, tupela i soim yu gutpela pasin yu mas bihainim long laip bilong yu.

²⁴Tok bilong tupela bai i helpim yu na bai ol meri nogut i no inap paulim yu, na bai yu no harim switpela tok bilong meri bilong narapela man.

²⁵Yu no ken aigris long naispela bodi bilong dispela meri. Na sapos em i lukluk long yu bilong pulim yu, orait yu no ken i go long em.

²⁶Sapos man i slip wantaim pamukmeri, em bai i no lusim bikpela pe tumas. I olsem pe bilong liklik hap kaikai tasol. Tasol sapos man i slip wantaim meri bilong narapela man, em bai i lusim bikpela pe tru. Em inap lusim laip bilong em yet.

²⁷Sapos yu holim paia klostu long bros bilong yu, orait ating siot bilong yu i no inap paia, a?

²⁸O sapos yu wokabaut antap long paia, ating paia i no inap kukim lek bilong yu, a?

²⁹Olsem tasol, sapos yu slip wantaim meri bilong narapela man, ol bai i mekim save long yu na yu no inap abrusim.

³⁰Sapos wanpela man i hangre na i stilim sampela kaikai, orait ol man i no save tok nogut long em.

³¹Tasol sapos ol i painimaut long dispela samting em i bin mekim, orait bai ol i kotim em na em i mas bekim planti samting moa, inap long pinisim olgeta samting long haus bilong en.

³²Tasol sapos man i slip wantaim meri bilong narapela man, em i kranki olgeta na i longlong tru. Man i mekim dispela pasin em i bagarapim em yet.

³³Ol man bai i paitim em na tok nogut long em na bai em i sem nogut oltaim.

³⁴Ol man i save belhat nogut tru, sapos narapela man i slip wantaim meri bilong ol. Olsem tasol man bilong dispela meri bai i belhat nogut tru na i bekim rong bilong dispela man na mekim save tru long em. Em i no inap marimari long em. Nogat tru.

³⁵Na em i no inap kisim bikpela mani samting bilong pinisim belhat bilong en.