Gutpela Sindaun 22:19-28

¹⁹Nau tasol mi laik autim dispela tok, bilong yu yet i ken harim, na bai yu ken bilip tru long Bikpela.

²⁰Mi bin raitim 30 gutpela tok bilong skulim yu gut na givim gutpela tingting na save long yu.

²¹Olsem na bai yu ken save as bilong tok tru. Na taim ol man i salim yu i go bilong painimaut wanem tok i tru, bai yu inap painimaut na bekim tok stret long ol.

²²Yu no ken ting ol rabisman, ol i man nating tasol, na yu pulim nating ol samting bilong ol. Na sapos ol i kamap long kot, orait yu no ken mekim kot i daunim ol,

²³long wanem, Bikpela bai i sambai long ol na helpim ol. Na sapos man i mekim nogut long ol rabisman, orait Bikpela bai i mekim nogut long em.

²⁴Yu no ken pren long ol man bilong kros kwik na bilong pairap nabaut.

²⁵Nogut yu kisim pasin bilong ol na bihain ol samting nogut i bagarapim yu.

²⁶Taim wanpela man i kisim dinau, yu no ken promis long bekim dispela dinau sapos em yet i no inap.

²⁷Nogut yu no inap bekim, na bai ol i kam kisim olgeta samting bilong yu, na bet bilong yu tu.

²⁸Yu no ken surikim mak bipo ol tumbuna i bin putim long graun bilong yu.