GUNALAIA TAUDIA 3:11-27

¹¹Unai dainai, lagani 40 lalonai, tano dekenai be maino ia noho. Unai murinai Otoniele Kena ia mase.

¹²Vadaeni Israela taudia be ma Lohiabada ena vairanai idia kara dika lou. Unai dainai Lohiabada ese Egalona, Moaba ena king ia hagoadaia, iena goada ese Israela ena goada ia hanaia.

¹³Inai Egalona ese Amono taudia, bona Amaleka taudia ia haboua, vadaeni idia ese Israela taudia idia halusia, bona Ieriko, pama audia hanua badana idia abia.

¹⁴Vadaeni Israela taudia ese Egalona, Moaba ena king, ena hesiai gaukara be lagani 18 lalonai idia karaia.

¹⁵To Israela taudia ese Lohiabada dekenai idia tai lou. Vadaeni Lohiabada ese tau ta ia abia hidi, ia ese idia do ia hamauria totona. Unai tau be Ehuda Gera, Beniamina iduhu tauna, ia be imana lauri tauna. Israela taudia ese edia harihari gaudia king Egalona dekenai idia siaia, Ehuda ena imana dekenai.

¹⁶Ehuda ese tuari kaia ta, ia sibona ena, ia karaia. Inai tuari kaia ena isena kahana kahana edia matana ia karaia, bona ena lata be 50 sentamita. Ehuda ese iena beleta idiba kahana dekenai tuari kaia ia atoa, bona iena rami dekena amo ia koua.

¹⁷Vadaeni ia ese unai harihari gauna be Egalona, Moaba ena king dekenai ia abia lao. Inai Egalona be tauanina bada herea tauna.

¹⁸Ehuda ese harihari gauna ia henia murinai, ia ese harihari gauna idia huaia taudia ia siaia lao.

¹⁹To Ehuda be nadi idia utua gabuna, Gilegala kahirakahira dekena amo ia giroa lou, king Egalona dekenai ia hereva, ia gwau, “King badana e, lau ese hunia hereva ta oi sibona totona lau mailaia inai.” Vadaeni king ese iena hesiai taudia ia oda henia, ia gwau, “Umui lao, ai ruaosi sibona do ai noho!” Unai neganai king ena hesiai taudia ibounai be ia dekena amo idia raka lao murimuri dekenai.

²⁰Vadaeni Ehuda be king dekenai ia raka vareai, king be daiutu keruma ta dekenai sibona ia helai. Ehuda ia gwau, “Hereva ta Dirava dekena amo lau mailaia vadaeni, oi totona.” Vadaeni king be ia toreisi.

²¹Unai neganai Ehuda ese, iena imana laurina dekenai, iena kaia, hunia gauna, idiba kahana dekena amo ia veria, Egalona ena bogana ia gwadaia.

²²Tuari kaia ena auauna danu be bogana lalonai ia vareai. Kaia ena matana be king ena doruna kahanai ia hedinarai. King ena bogana ese kaia ia koua, vadaeni Ehuda ia veria lou lasi.

²³Ehuda be ruma ena murimurina dekenai ia lao, bona unai daiutu ena iduara ia loka namonamo.

²⁴Ia raka lao murinai, hesiai taudia idia mai, idia itaia daiutu ena iduara ia loka, vadaeni idia gwau, “Sedira king be mei totona ia lao.”

²⁵Idia be nega daudau idia naria, to king ese iduara ia kehoa lasi. Vadaeni ki idia abia, iduara idia kehoa, edia biaguna idia itaia, reirei dekenai ia hekure, ia mase vadaeni.

²⁶To hesiai taudia ese king totona idia naria noho neganai, Ehuda be ia heau mauri, ia ese nadi idia utua gabuna ia hanaia, Seira dekenai ia ginidae.

²⁷Unuseni Ehuda ese kibi ia hiriria Eparaima Ororo dekenai. Vadaeni Israela taudia be ia danu ororo dekena amo idia diho lao, bona Ehuda ese idia ia gunalaia.