Guiꞌch par ree bén Rom 15:5-16

⁵Dios, bén razaladx pacens në guialragnë chitëë yalenyaꞌ ree, laaman gagnë lëjt din guibandi nadxag con gra ree xcompniaridi ziꞌc na̱j xixgab Jesucrist.

⁶Din tiblojzi guilies reeman xvalor Dios, xdad dux Dad ree Jesucrist.

⁷Zeel, ziꞌc bacaꞌ Jesucrist lëjt par gaquidi xbejnman, ziangajc gol guneenë ree xcompniaridi zagdxe, bén rliladx ree laaman par guiliesidi xvalor Dios.

⁸Gol basaaladx guial biꞌt Cristo loj guidxliuj par gulüüman bén Israel ree xtiidx Dios, zian bidgaguieenman sirv loj reeman, persi gojc cumplid promejs ni been Dios loj ree xbéngulal reeman, abiꞌ zian biguien guial rüjnqui Dios cumplid xtiidxaman.

⁹Biꞌt tëë Cristo loj guidxliuj din por laaman, bén ad najt ree bén Israel guilies reeman xvalor Dios guial rayaman laa reeman, ziꞌc ca loj xtiidxaman lod rëb: Xt loj ree bén ad najt bén Israel guzatan lüj guial najl benzaꞌc. Gol tëën cant ree par lüj.

¹⁰Ziangajc rëb zatiblajt loj xtiidx Dios: Lëjt bén ad najt ree bén Israel, gol babaa ziꞌc rabaa ree bén Israel.

¹¹Zatiblajt loj xtiidx Dios rëb: Gra ree bén ad najt bén Israel. Në los demazri ree bejn, gol gules xvalor Dios.

¹²Rëb tëë Isaías: Loj xdiaa Isaí, grii tijb bén nabee bénguidxliuj ree, xt ree bén ad najt bén Israel, chililadx laaman.

¹³Dios bén ragnë dunuj ree ralëjz ree ni caylëjz ree, laaman yaguꞌ luxdoodi zagdxe yabeꞌcdxe tëëman luxdoodi guial rliladxidi laaman, din cwëz daꞌtidi ni guneeman por xSprijt Dios.

¹⁴Compniar raliduladx ree Jesucrist, naj ragbeechaaw guial zagdxe nabandi con ree xcompniaridi, ma ragbee tëëdi zagdxe xhienaag chinalidi xnejz Dios, xt rajc rudëëdidi consejw rulüü tëë xcompniaridi.

¹⁵Per majsi zian, tioꞌp choon lajt loj guiꞌch guie bacan diidx naa, din yasaaladxidi xhienaag guibandi. Rünan zian por guialrniabee ni ma banee Dios naj,

¹⁶din günan sirv loj Jesucrist. Din da dxiinan na̱j gulün bén ad najt ree bén Israel xtiidxzaꞌc Dios din guiban reeman ziꞌc rën Dios, din gac reeman naya niz lojman por xSprijtaman.