Golle Nulaaɓe 13:32-45

³²Minen, miɗen ngaddana on Kabaaru Lobbo: ko Laamɗo aadaninoo maamiraaɓe meeɗen ɗuum,

³³yottinanii en, enen taaniraaɓe muɓɓen. O waɗii ɗum e ley ko o iirtini Iisaa. Noon winndiraa ley jimol Jabuura suura ɗiɗi: «Wo a ɓiyam, hannden mi laatake Baaba maa.»

³⁴Katin du, Laamɗo iirtinii mo e hakkunde maayɓe, accaay ɓanndu makko nyoli. Noon haaldunoo nde wi'unoo: «Mi hokkan on barkeeji ceniiɗi ɗi mbonataa, ɗi podaninoomi Daawda ɗiin.»

³⁵Ɗum waɗi de o wi'i e Jabuura suura goɗɗo: «A accataa Ceniiɗo maa nyola.»

³⁶Daawda gollii ko Laamɗo muuyi golla e jamaanu muuɗum. Caggal ɗuum, o maayi. Ɓanndu makko hawrunduraa e maamiraaɓe makko, ndu nyoli.

³⁷Ammaa mo Laamɗo iirtini oon nyolaay.

³⁸Sakiraaɓe, anndee wo saabe makko de mbaajaɗon yaafeede hakkeeji.

³⁹Tawreeta Muusaa waawaa waɗude neɗɗo ponnditiiɗo. De kanko kaa, goonɗinɗo mo fuu, o ndaardan ɗum ponnditiiɗo.

⁴⁰Ɗum le, kaybee taa ko annabaaɓe cappinoo ɗuum hewtoo on:

⁴¹«Onon jalnortooɓe golle am, ndaaree, de ɗum haaynoo on, de kalkon! Sabo mi waɗan goɗɗum e ley wakkati mooɗon, mo on ngoonɗintaa fay si neɗɗo haalannoo on.»

⁴²Caggal Pool e Barnabas njaltii waajordu nduun, jamaa oon nyaagii ɓe ɓe ngarta fowteteende waroore, faa ɓe njaha yeeso e waaju maɓɓe.

⁴³Caggal ko kawrital ngaal waɗi ɗuum, Alhuudiyankooɓe heewɓe e naatuɓe e diina muɓɓen njokki Pool e Barnabas. Ɓeen ɗiɗo fuu ina kaalda e maɓɓe, ina tindina ɓe ɓe keddoo e moƴƴere Laamɗo.

⁴⁴Fowteteende jokkunde ndeen, yimɓe ngalluure ndeen fuu kawriti faa kettinoo konngol Laamɗo.

⁴⁵Ammaa nde Alhuudiyankooɓe ɓeen njiinoo jamaa oon ndeen, kiram naati ɓe. Iɓe njedda ko Pool waajotoo ɗuum, iɓe njenna ɗum.