Golle Nelaaɓe 2:12-43

¹²Ɓe fuu ɓe mbemmbaa, ɓe cikkitii, ɓe mbiyondiri: —Koɗum ɗum foti laataade?

¹³Woɓɓe ana njaayra goonɗinɓe ɓee, ana mbiya: —Ɓe haarɓe doro so eɓe cigira!

¹⁴Piyeer dardii e sappo e go'o ɓee, toowni daande muuɗum, wii jamaa oo: —Onon Yahuudiyankooɓe e onon jooɗiiɓe Urusaliima fuu, kettinee haala am yalla oɗon paama kabaaru gaɗuɗo oo.

¹⁵Ɓee yimɓe nganaa sigirɓe hono no onon miildaton nii, sabi jooni yo ɲawlal tan.

¹⁶Ɗum woni ko annabi Yo'ila wii:

¹⁷«Laamɗo wii: E ley ɲalaaɗe cakitotooɗe ɗee mi saakan Ruuhu am e dow tagaaɓe fuu. Ɓiɓɓe mooɗon worɓe e rewɓe kaaliran hono no annabaaɓe nii, jokolɓe mooɗon njiyan ko ƴellitii e mum'en, nayeeɓe mooɗon koyɗinte.

¹⁸Fay gollooɓe am worɓe e gollooɓe am rewɓe, mi saakan Ruuhu am dow muuɗum'en e ley ɗeen ɲalaaɗe, ɓe kaaltan konngol ngol loow-mi e maɓɓe ngol.

¹⁹Mi waɗan kaayɗe dow kammu, mi waɗan taagumansaaji dow leydi, ɗi laatoo ƴiiƴam e yiite e cuurki.

²⁰Fade ɲannde gartol Joomiraaɗo mawnde teddunde ndee warde, naange niɓɓan, lewru wojjan hono no ƴiiƴam nii.

²¹Nden, neɗɗo fuu nodduɗo innde Joomiraaɗo hisinte.»

²²Piyeer wii kasen: —Israa'iilankooɓe, kettinee ɗii haalaaji: Iisaa Nasaraatunke oo yo neɗɗo mo Laamɗo suɓanii on. Laamɗo hokki ɗum baawɗe, o hokki ɗum waɗude kaayɗe e taagumansaaji hakkunde mon, no onon e ko'e mon anndir-ɗon nii.

²³On ngaɗii oon neɗɗo e juuɗe bonɓe, on tontii mo e leggal bardugal, on mbaririi mo no Laamɗo muuyrunoo ɗum laatoo gila arannde nii.

²⁴Kaa Laamɗo wuurtinii mo, itti mo e naawalla maayde, sabi maayde ndee waawaanoo heddoraade mo.

²⁵Sabi Daawuuda ana haala haala makko nde wii: «Wakkati fuu miɗo yiya Joomiraaɗo, sabi omo ɲaamo am, pati mi yeryerta.

²⁶Saabe majjum ɓernde am seyii, ɗemngal am jaarii faa terɗe am duu mbaaltoo dow jikke,

²⁷sabi a yoppataa yonki am hakkunde maayɓe, a accataa Ceniiɗo maa oo ɲola.

²⁸A anndinii kam laawi nguurndam, miɗo seyii sabi aɗa wondi e am.»

²⁹Piyeer jokkini hen: —Sakiraaɓe, miɗo haalana on ko laaɓi haala njaati meeɗen Daawuuda: o maayii, o iraama, yanaande makko ndee ana ɗo meeɗen ɗoo faa hannde.

³⁰O annabaajo, omo anndi Laamɗo hunanike mo gooto e taaniraaɓe makko joottoto e bimmbeere makko laamu.

³¹O adii o yii o haali haala immitagol Almasiihu, kaɲum yonki muuɗum accaaka hakkunde maayɓe, terɗe muuɗum ɲolaali.

³²Oo woni Iisaa mo Laamɗo immintini, min fuu miɗen ceedii.

³³Laamɗo toowni mo, heedini mo ɲaamo muuɗum, mo heɓi e Baabiraaɗo Ruuhu Ceniiɗo podananooɗo en oo, o saaki ɗum. Jooni oɗon njiya ɗum, oɗon nana ɗum.

³⁴Sabi Daawuuda meeɗaali ŋabbude dow kammu, kaa wii: «Joomiraaɗo wii Joomam: Jooɗa ɲaamo am,

³⁵faa mi waɗa njaɓɓaa wayɓe maa.»

³⁶Yo suudu baaba Israa'iila fuu taƴor Laamɗo waɗii Iisaa mo tontu-ɗon e leggal bardugal oo Joomiraaɗo, waɗii ɗum Almasiihu.

³⁷Nde ɓe nannoo kaa haala ndee, ɓe taƴi sanne, ɓe mbii Piyeer e nelaaɓe heddiiɓe ɓee: —Sakiraaɓe, koɗum min ngaɗata?

³⁸Piyeer jaabii ɓe, wii: —Tuubee, gooto e mooɗon fuu lootiree lootogal batisima e innde Iisaa Almasiihu, yalla oɗon keɓa yaafeede luutti. Nden on ndokkete Ruuhu Ceniiɗo.

³⁹Sabi fodoore ana woodani on, onon e ɓiɓɓe mooɗon e woɗɗuɓe fuu. Ende woodani neɗɗo mo Joomiraaɗo Laamɗo meeɗen noddi fuu.

⁴⁰Caggal ɗum, Piyeer seedanike ɓe haalaaji goɗɗi keewɗi, ana waajoo ɓe, ana wiya: —Celee e ndee fedde bonnde yalla oɗon kisa.

⁴¹Jaɓuɓe haala makko ɓee lootaa lootogal batisima. Ɲannde nden, ana foti ujunaaji tati neɗɗo ko naati e deental goonɗinɓe ngal.

⁴²Eɓe njokki waaju nelaaɓe ɓee, eɓe nanngondiri e deental maɓɓe ngal, eɓe taƴa buuru, kasen eɓe ngaɗida duwaawuuji.

⁴³Kulol naati e gooto fuu, sabi nelaaɓe ɓee kaɲum'en duu ana ngaɗannoo kaayɗe e taagumansaaji keewɗi.