Golle Nelaaɓe 13:28-45

²⁸Fay so taweede ɓe keɓaali feloore fay wootere nde ɓe pelira mo yalla omo maaya, ɓe ndaardii Pilaatu o waree.

²⁹Nde ɓe ngolli ko Binndi ɗii mbiinoo e makko koo faa hiɓɓi ndee, ɓe njippini mo leggal bardugal ngal, ɓe ngaɗi mo e yanaande.

³⁰Kaa Laamɗo wuurtinii mo.

³¹Balɗe kuurɗe o ɓanngani wondunooɓe e makko ɓee gila Galili faa Urusaliima. Ɓeen ngoni seettantooɓe mo yeeso yimɓe jooni.

³²Minen, miɗen ceynira on fodoore nde njaatiraaɓe meeɗen podanaa ndee,

³³Laamɗo hiɓɓinanii en ɗum, enen ɓiɓɓe maɓɓe, nde wuurtinnoo Iisaa ndee. No winndiraa kasen e jimol Jabuura ɗiɗaɓol: «Aan, a ɓiyam, hannde ndimu-maa-mi.»

³⁴Kasen, haala immitagol makko e hakkunde maayɓe e waasugol makko ɲolde, nii Laamɗo wii: «Mi tabintinanan on podooje ceniiɗe ɗe mbontataa, ɗe podannoo-mi Daawuuda ɗee.»

³⁵Ɗum waɗi so o wii e nokku goɗɗo: «A accataa Ceniiɗo maa ɲola.»

³⁶Daawuuda waɗii sago Laamɗo e jamaanu muuɗum. Caggal ɗum, o maayi, o mooɓtidaa e njaatiraaɓe makko, o ɲoli.

³⁷Kaa mo Laamɗo wuurtini oo ɲolaali.

³⁸Sakiraaɓe, anndee saabe makko mbaajore-ɗon yaafeede luutti.

³⁹Sariya Muusaa waawaa waɗude neɗɗo pooccitiiɗo, kaa kanko, goonɗinɗo mo fuu, o nanngiran ɗum pooccitiiɗo.

⁴⁰Ɗum nee, kaybee pati ko annabaaɓe cappinoo koo hewto on:

⁴¹«Onon hoynuɓe, yo on kaayne yo on kalko! Sabi miɗo nii golla golle e ley wakkati mooɗon, golle mo on ngoonɗintaa so neɗɗo haalaniino on.»

⁴²Caggal Pool e Barnabas njaltii waajordu nduu, jamaa oo ndaardi ɓe yo ɓe ngartu fowteteende waroore, yalla eɓe njokka e waaju maɓɓe oo.

⁴³Caggal mooɓtagol ngol, Yahuudiyankooɓe heewɓe e naatuɓe e diina maɓɓe njokki e Pool e Barnabas. Ɓeen ɗiɗon duu ana kaalda e maɓɓe ana mbaajoo ɓe yo ɓe ɲiiɓu e moƴƴere Laamɗo.

⁴⁴Fowteteende jokkunde hen ndee, ngalluure ndee fuu mooɓtii yalla ana hettinoo konngol Laamɗo.

⁴⁵Kaa nde Yahuudiyankooɓe ɓee njiinoo oo jamaa ndee, haasidaaku naati e muuɗum'en, eɓe njedda ko Pool waajotoo koo, eɓe njenna ɗum.