Golle Nelaaɓe 10:1-33

¹Gorko biyeteeɗo Korneliyus ana wonnoo Kaysariya. O hooreejo konu biyeteeɗo Italiyanke.

²O kuppidiɗɗo e diina, kanko e koreeji makko fuu ɓe hulɓe Laamɗo. Omo sakkoo Yahuudiyankooɓe sadakaaji keewɗi, omo ɲaagoo Laamɗo wakkati fuu.

³Kiikiiɗe gooto hono wakkati sallifanaa ɓuuɓuɗo, o heɓi holleede, o yii malaa'ika ana naata ley suudu makko ana wiya mo: —Korneliyus!

⁴O huli faa gite makko paapii, o wii ɗum: —Giɗo Laamɗo, kori jam? Malaa'ika oo wii mo: —Laamɗo jaabanike ma duwaawuuji maa e sadakaaji maa.

⁵Nel jooni worɓe to ngeenndi Yoppe, nodda biyeteeɗo Simon, noddirteeɗo Piyeer.

⁶Omo jippii galle ɲobboowo guri biyeteeɗo Simon, mo galle muuɗum heedi e maayo geeci.

⁷Nde malaa'ika kaaldannooɗo e makko oo wittunoo ndee, o noddi gollooɓe makko ɗiɗon e sordaasi gooto kulɗo Laamɗo jeyaaɗo e howruuɓe makko.

⁸O haalani ɓe ko malaa'ika oo wii koo fuu, o neli ɓe Yoppe.

⁹Janngo muuɗum, eɓe e laawol. Nde worɓe taton ɓee ɓattii ngeenndi ndii ndee, tawi Piyeer ŋabbii dow bene muuɗum wakkati hakkunde naange faa waɗa duwaawu.

¹⁰O yolbi faa sanne, omo yiɗi ɲaamde. Nde ɓe moƴƴinanta mo ɲaamdu ndee, Laamɗo holli mo,

¹¹o yii kammu udditike, huunde wa'unde no daɗɗamaare mawnde, nde coɓɓuli muuɗum nay fuu kaɓɓaa, ana rennee faade e leydi.

¹²Sii daabaaji fuu, ɗi koyɗe nay e ŋaarooji, kaɲum e sii pooli fuu ana e mayre.

¹³Daande wii mo: —Piyeer, imma, hirsu, ɲaam!

¹⁴Piyeer wii: —Sawra Joomiraaɗo! Abada mi ɲaamaali ko harmi naa ko soɓi.

¹⁵Daande ndee wii mo kasen: —Pati harmin ko Laamɗo senni.

¹⁶Ɗum waɗi non cili tati. Nden daɗɗamaare ndee ŋabbintinaa dow kammu.

¹⁷Ko Piyeer hollaa koo, omo miiloo no ɗum waawi laatoraade. Tawi e oon wakkati, worɓe ɓe Korneliyus nelnoo ɓee, lamndike galle Simon. Ɓe ngari, ɓe ndarii e damal ngal.

¹⁸Ɓe noddi, ɓe lamndii yalla Simon noddirteeɗo Piyeer ɗon jippii.

¹⁹Piyeer ana heddii miilde ko yii koo, faa Ruuhu wii ɗum: —Worɓe taton ana tewte.

²⁰Imma, jippa, njaadaa e maɓɓe tawa a sikkitaaki, sabi miin neli ɓe.

²¹Piyeer jippii, wii worɓe ɓee: —Miɗo nii, miin woni mo tewtaton oo. Kori jam waddi on?

²²Ɓe njaabii, ɓe mbii: —Korneliyus hooreejo konu neli min. O gorko dartiiɗo, kulɗo Laamɗo, mo leɲol Yahuudiyankooɓe fuu seettanii moƴƴere. Malaa'ika ceniiɗo yamirii mo min nodde, ngaraa suudu makko, yalla omo nana waaju maa.

²³Piyeer noddi ɓe, silmini ɓe, jippini ɓe galle muuɗum. Janngo muuɗum, o immii, o yaadi e maɓɓe. Yoga e sakiraaɓe jeyaaɓe Yoppe njaadi e makko.

²⁴Faɓɓi-janngo muuɗum ɓe njottii Kaysariya. Korneliyus ana tijjinoo ɓe, noddi sakiraaɓe muuɗum e yiɓɓe muuɗum ɓadiiɓe.

²⁵Nde Piyeer naatannoo ndee, Korneliyus jaɓɓii ɗum, sujidani ɗum.

²⁶Piyeer itti mo e sujuudu nduu, wii: —Imma, sabi miin duu mi neɗɗo tan.

²⁷Piyeer ana haalda e makko, faa ɓe naati galle oo, tawi ton yimɓe heewɓe ana mooɓtii.

²⁸O wii ɓe: —Oɗon anndi dagantaako Yahuudiyanke jokkondira e mo wanaa Yahuudiyanke, naa naatude suudu muuɗum. Kaa Laamɗo hollii kam pati mi nanngira fay gooto karmuɗo naa coɓuɗo.

²⁹Ɗum waɗi nde nelan-ɗon kam ndee, mi warii, mi ujaaki. Ɗum nee, kaalanee kam, saabe koɗum noddir-ɗon kam?

³⁰Korneliyus jaabii, wii: —Hannde woni balɗe nay, miɗo waɗa duwaawu ley suudu am e oo ɗoo wakkati, faa gorko mo kaddule jalbooje wari, darii yeeso am,

³¹wii: «Korneliyus, Laamɗo jaabanike ma duwaawuuji maa e sadakaaji maa.

³²Jooni, nel e ngeenndi mbiyeteendi Yoppe, noddane-ɗaa gorko biyeteeɗo Simon, noddirteeɗo Piyeer. Omo jippii galle ɲobboowo guri biyeteeɗo Simon, mo galle muuɗum heedi e maayo geeci.»

³³Ɗum waɗi so nel-mi noddoye-ɗaa oon wakkati fuu. Ko ngar-ɗaa koo gasii sanne. Jooni min fuu miɗen nii yeeso Laamɗo faa min kettinoo ko Joomiraaɗo yamir maa mbaajo-ɗaa fuu.