Godigo Sęba Tagala Palai Bidigo Po 5:15-35

¹⁵Jisasgo tagala palai bidi dabego bomai sę mu ebaso, tigidali we bidigo augwa ama me, abe me gasi baso, gologobe wade munama, tų sesegeba selasa asali. Augwaligo homugo Pita te tų sesegedu biliyu, agai giligade bilibo noma te gasi yai bidi tigiba bogibaide ma dwagi yai ilimainu.

¹⁶Jerusalem pąde bida bida pabo we bidigo gasi yai we bidi me, dwai mobo haubogo tuai we bidi me, Jisasgo tagala palai bidigo dwagi yai ma ilimaio olama, magasali. Tama augwali tigidali dwagi yai ma yali.

¹⁷Te side te pris hani tobolu bidi dede, agai abagi solo dede, augwaligo lotu hani nogi Sadyusi, augwaligo te Jisasgo tagala palai bidi dabebolo dwai homu mu yali. Tigidali we bidigo te Jisasgo tagala palai bidi dabe dali dwagi yai homu ebaso, te Sadyusi dabego moni sębę elama, elainu yalio.

¹⁸Augwaligo te Jisasgo tagala palai bidi dabe tulama, kalabus beba muani, dwai sę ebo bidi dabe dali hodobo te kalabus beba muani.

¹⁹Tiali goli, te hulide Godigo ensel bidi deligo te kalabus be tų dayagasali. Tų dayagaselama, te Jisasgo tagala palai bidi dabe buluba tagala palama, augwalibolo te po wai,

²⁰“Te dage Moni Lotu Be tempel teba dolaligi pelama, we bidibolo te gesi kolesaga po tigidali ola mao,” te po wai.

²¹Tama Jisasgo tagala palai bidi dabe augwaligo te po wali pelama, kigamu hulide te Moni Lotu Be tempel tomoba pelama, tigidali we bidibolo te po ola mabo gagalali. Te pris tobolu bidi dali, agai abagi solo dabe dali, augwaligo te Juda bidi monu dabe i olama, te kaunsilde moni po tų miainu yai. Augwali deliba sisinagaselama, augwaligo enesigi bidi dabe te kalabus beba tagala palama, “Te Jisasgo tagala palai bage eba odasa asao,” wali.

²²Tiali goli, augwali te kalabus beba sabolama, Jisasgo tagala palai bidi dabe te be tomode bidibo sube. Tama tibaso, te bidi dabe kaunsilba ma pelama, augwalibolo te po wai,

²³“Te da te kalabus beba sabolama, dago suali, be tų palialubo suali, te kalabus bidi tonalubo bidi dabe tonalubo suali, te be tųde. Tiali goli, te be tų dalama suali, te be tomode te bidi menio,” te po wai.

²⁴Tama te Moni Lotu Be tempel genuai enesigi bidi dali, te pris genuai bidi dabe dali, augwaligo te po odama, augwaligo moni homu yali. Augwaligo te po wai, “Te magi sę yaliwe?”

²⁵Bidi me deli te be tomoba aselama, agai augwalibolo te po wai, “Odao. Dagego kalabusiba muai bidi dabe, augwaligo te we bidibolo po ola mobao, te Moni Lotu Be tempel, tede dolalubo,” wali.

²⁶Tama te po obaso, te genuai enesigi bidi dali, agai enesigi bidi dabe dali, augwali pelama, Jisasgo tagala palai bidi dabe odasa asali. Augwali sesali sogo elebeo. Wi elama, augwaligo homugo “Dago te bidi dabe elebaso, te we bidigo masigi sąnama, da elaibao,” te homu yai.

²⁷Augwaligo te bidi dabe te be tomoba dodoligi pali, te kaunsil dabe gesabide. Tede dolalubadi, te pris tobolu bidigo augwalibolo te po wai,

²⁸“Te dago dagebolo Jisasgo po pusamuo olama, habu selai. Dagego homugo te da olo nai dao. Megi dagego tigidali we bidi Jerusalemde te Jisasgo po ola mawai. Dagego homugo dago Jisas elama, isilai,” agai te po wai.

²⁹Te tiali goli, Pita dali, me badu Jisasgo tagala palai bidi dabe, augwaligo te po wei ponoyu, te po wai, “Te dago dagego wali po wali pogobeo. Godigo dabolo mani genuai po mu dago wali paibao.

³⁰Dago wąį dabe augwaligo polobadu Godibolo lotu po wai dao. Tama dagego Jisas te ni pedaide neligo enama, isalio. Tiali goli, dago wąįgo God, te Godigo digi Jisas ma hodolali.

³¹Tama Godigo selama, ogwaba pelama, Jisas te Godigo dolo nogo badu bidibo, moni nogi elalubaso. Tama tede bidibo, te we bidi tobolu elalubo bidi da, te tau sabo bidi da, te Israel we bidi augwaligo homu begelama, Godigo augwaligo yali dwai sę dabe sela sąmainu ebao.

³²Tama te Jisasgo polobadu yali sę te we bidigo konemai hagede, dago tede po sagwa mabo bidi dabe da. God agai po wali pabo we bidibolo te Dwagi Yai Mobo Bidi mabo da. Te Godigo Dwagi Yai Mobo Bidi me, te Jisasgo ebo sę konebo da, te sęde po sagwa mabo dao,” Pitago te po wai.

³³Te kaunsil dabego Pitago po odama, moni sębę mu yali. Augwaligo homugo ‘Dago te Jisasgo tagala palai bidi dabe elaibao’ homu yai.

³⁴Tiali goli, bidi me deli augwali tomode bidali, te Juda dabego kaunsil bidi doligiluali te Farisi bidi sibi bidi, te bidi nogi Gamaliel. Te bidi agai Mosesgo bomo yai po pusubo bidi, tigidali we bidi augwaligo bugagia konemai hagede, tama te we bidigo te dwagi yai bidi mu augwaligo aga dali dwagi yai homu elama, te bidi nogi ugwaba sali. Te bidi Gamaliel te kaunsil tomode dolaluyu tama te po wali, “Te Jisasgo tagala palai bidi dabe gasa habuba osogo pomainao.”

³⁵Augwali teba pelama, agai te kaunsil dabebolo te po wai, “Dage Israel bidi, dagego te bagebolo ebo sę dua yao.