Godigo Sęba Tagala Palai Bidigo Po 16:4-16

⁴Tama augwali te bulude bilali, te sogo Jisasgo po wali pabo hani dali sisinama bidali, te Jisasgo tagala palai bidi me, tobolu bidi dali augwaligo Jerusalemde polobadu wali po ola mani. Augwaligo “Dagego te wali po bugagia wali piąo,” wali.

⁵Tama tibaso, Jisasgo po wali pabo hani tigidali augwaligo bomo salio. Tama umabo we bidi te Jisasgo po wali pabo we bidi tomoba tigidali deli deli sogo asali.

⁶Te nosali Pol dali aga dwasianu hani dali, augwaligo homugo te Esia tǫba pabo homu yali. Tiali goli Godigo Dwagi Yai Mobo Bidigo augwali si te bulu Esiaba pelamuo po olama, habu seleyu, tų sinilani. Tama tibaso, augwaligo Frigia tǫ dali, Galesia tǫ dali te si tomodu pali.

⁷Tama te sogo augwali Misia tǫ dąį sesegeba sabolali. Augwaligo homugo te Bitinia tǫ tomoba pabo homu yai. Tiali goli Jisasgo Dwagi Yai Mobo Bidigo te tų ma paliali.

⁸Tama tibaso, augwaligo Misia tǫ tomodu peyu, augwali te be nani Troasba sabolali, te nabis bulu da.

⁹Tama te sogo hulide Polgo na gagawai yali. Agai Masedonia tǫ bidi me deli dolalubo suali. Aga aselama, Polbolo bomo elama, hanalu wali, “Nage e Masedonia tǫba aselama, da tau sagasao,” wali.

¹⁰Te sogo Polgo na gagawai elama, te sogo ena Luk da Pol dali munasa pali, tama dago walu dabe polo sisi elama, dago geba gegelama, Masedonia tǫba pai hagede. Dago koneai, Godigo da i wali, agai dwagi yai po tede bidibo we bidibolo ola momainu yai.

¹¹Te tama da te Troas be nani taga pelama, da gebadu pelama, te Samotres tamu ąį tomode elalubo bulu teba dolo pali. Da pilama, do kigamu geba selama, da Neapolis be naniba tagaligi palio, sabolalio.

¹²Tama dago Neapolis taga palio, augwaligo moni genuai taunba pali, te bulu nogi Filipai. Te bulu moni genuai bulu mu da, Masedonia tǫde te bulu deli tobolu elalubo da. Te Rom bidi hani tede bidu, tonalubo da. Tama da te bulude hauwa sogo mu bidali.

¹³Tama te Juda bidigo lotu po wabo Sabatde da te be nani tagalama, buluba pali. Da te moni pabo ąį sesegeba bidigi pali. Dago te po odali, te pesagede me badu Juda dabe augwali deliba sisinama, Godibolo po wabo dao wali. Tama dago we dabe me badubolo te Jisasgo po dago augwalibolo ola manio.

¹⁴We me deli bidali, dago po wabo agai odali. Te we nogi Lidia, te Taiataira be nanidu polobadu asali. Te we agai ebo sę da te nene gagawai nami ugwa agai gasa bidibolo menama, monego abelebo sę ebo da. Tama te we agai Godibolo lotu po wabo da, tigidali sogo. Tama agai Polgo po wabo odalio, tama Genuai Bidigo te wego homu dwagi yai ilali, te wego Polgo wabo po bugagia odomainu yali. Te sogo te wego homu tigidali Kraisba muani.

¹⁵Tiali da dago aga dali agai bede bidibo we bidi dali baptais mani. Tama agai dabolo te po wali, “Dagego homugo eno Jisas wali pabo homu ebaso da, eno homugo Jisas mu konealu baso da, teda dage aselama, eno beba bidagasao, osogo,” te po wai. Tama agai “Dage eno beba pinao” wali bomo mu yali. Tama tibaso, da aga dali pai.

¹⁶Te me sogo da te Godibolo gedu haluasa po wabo pesageba pobadi, tama dago wegi me deli asobo suai. Te wegi te mone sisąbo sę ebo wegi da. Dwai mobo me deligo te wegi tigide dagawai elaluali. Te dwai mobogo te wegibolo te we bidigo nosali yabo sę po ola mabo da, te wegigo pedauwalidu te po wabo da. Tama te wegi sęde bidu, olo dali aga tonalubo bidigo nai sela tubo da. Umabo we bidi aselama, augwaligo nosali yabo sę po te wegigo augwalibolo ola momai hagede asai. Augwaligo mone ge te wegibolo menama, nosali te wegigo te po pusubo da. Tama elama, te wegi tonalubo bidi dabe augwaligo umabo masigi mu sabo dao.