Godigo Sęba Tagala Palai Bidigo Po 16:17-32

¹⁷Tama te wegigo agai da dali Pol dali sulama, wali asali. Wali asobadi, agai po bomonama mu wali, agai te po weyu, we bidi dabebolo te po wali, “E bidi dabe te Genuai Bidi Godigo sę ebo bidi dao,” wali. “Augwali asali da, dagebolo Godigo dage ma sabo tų po ola mawai hagede asalio,” te po wai.

¹⁸Tama te wegigo agai umabo sogo tama naga tiali. Tibaso, nosali Pol aga hagela mu yali. Pol aga begegi solama, te dwai mobobolo te po wali, “Eno Jisas Kraisgo bomode nagebolo obao,” wali, “te wegi tagalama, nage pao.” Pol agai te po olama, tama te dwai mobogo te wegi polo taga pali.

¹⁹Tama te wegigo te gasa bidigo nosali yabo sę po ma pusube. Te sogo te wegi tonalubo bidi dabego koneani, augwaligo mone sabo sę dolo baso, tama augwaligo Pol dali Sailas dali nogo tolasa, te tobolu bidi dabego po tų ebo pesageba odasa pali.

²⁰Te augwaligo tega si genuai Rom gavman bidi pageba odasa pali. Tama augwaligo te po wali, “Dagego te Juda hani bidi si suao. Tama augwali sigo dwai hagoma ebo kolesaga dago bulu tomode yalio,” wali.

²¹“Da Rom bidi da, tiali goli e bidi sigo da gasagi yai kolesaga ola mabo da. Te kolesaga te da Rom bidi dago kolesaga tiwai menio. Duga bomo yai po elalubaso, tama augwali sigo te kolesaga me te wali po tiwai me dago ilamuo,” te po wai.

²²Tama te tonaluali we bidi augwaligo te bidi sibolo dwai po wali, tama augwaligo te bidi si elebo gagalali. Tama te po tų ebo tobolu bidigo te enesigi bidibolo po wali, “Augwali sigo gudubo ugwa peda sanama, keloago tudi badu elao,” wali.

²³Te tiwai obaso, augwaligo te bidi si hauwa sogo mu keloago elali. Tama nosali augwaligo te bidi si kalabus beba nogo tulama, sągi pali. Tama te po tų yali bidi dabe augwaligo te kalabus bidi tonalubo tobolu bidibolo bomai po mu wali, “Nago te bidi si bugagia tonaluao,” wali, “augwali si wi pabuo.”

²⁴Tama te bomai po odama, te kalabus bidi tonalubo tobolu bidi agai te Pol dali Sailas dali si odasa pelama, te moni dąį todogo pai te masigigo nigai be habu muba tagaligi pali. Tama te bidi si moni ni pedai si dudulaweba sągą si tagalaluama, ma lok dąų walali.

²⁵Te huli tomode mu Pol dali Sailas dali sigo Godibolo po weyu, aga nogi ugwaba sabo balia dabe weyu bidali. Tama te kalabus bede bidali bidi dabe me badu augwaligo te balia po wabo odali.

²⁶Tama tibadi, moni tǫ mali polo yali, te kalabus be ni dabe togwa pali, te be tų dabe polo augwa digi dala pali. Te augwaligo nogode kęani aligabo bono aga digi pisagana pali.

²⁷Tama te kalabus bidi tonalubo tobolu bidi aga hodaluama, suali, te kalabus bede be tų tigidali dalalubo suali. Agai tama homu yali, ‘Kalabus bidi tigidali wi pali dao,’ homu yali. Tama tibaso, agai homugo ‘Genuai gavman bidigo ena elaibao,’ homu yali. Te homu elama, aga moni ge hwą kugulude walaluai hwą ugwa dią selama, aga digi tabide elainu yali.

²⁸Tiali goli, Polgo agai moni po mu tama wali, “Naga digi ma elegio,” wali. “Da wi pabeo, da tigidali me bidibao,” wali.

²⁹Tama te kalabus bidi tonalubo tobolu bidi agai te enesigi bidi i weyu, te po wali, “Sole selasa asao,” wali. Tama sole selama, agai te kalabus be tomoba polo pali. Agai moni wi mu elama, didibili yali. Didibili ebadi, agai tobolu Pol dali Sailas dali si sągą pageba muani.

³⁰Tama agai tega si buluba odasa pelama, hanalu wali, “Dage si genuai bidi dao. Eno magi sę elama, Godigo eno yali dwai sę sela sąmainu, Godigo ena ma sogowe?” wali.

³¹Tama Polgo agabolo te po wali, “Nago homu tigidali naga Jisas Genuai Bidi teba muyu da, te nage tigidali sogo bugagia bidaiba, Godigo nage dali nago bede bidibo we bidi dali ma saibao,” wali.

³²Tama augwali sigo Jisasgo dwagi yai po aga dali, aga hani dali augwalibolo pusa mani.