Godigo Sęba Tagala Palai Bidigo Po 13:25-52

²⁵Tama Jon agai sę silabo maga ebadi, agai te we bidibolo te po wai, ‘Dagego homugo ena de dawe?’ wali. ‘Ena te dagego tonalubo bidi menio. Tiali goli, dagego odao. Bidi me deli nosali aga ena tudi badu asaibao. Aga da, te genuai bidi mu da. Ena da nogi elalubo bidi menio. Eno agai sągą nadoba bono pisigabo sę yainogo ebaso da, teda te sę ebo eno usu egobeo,’ Jongo te po wai.”

²⁶Te bidi Polgo te po olama, po me ola mani, “Ama dede, abe dede, dage Abrahamgo hani bidi dagego me, odao. Dage Juda bidi hani isąwai bidi, dage God wali pabo dao, dagego me odao. Godigo agai da ma dobola sabo tų nigali po te da tigidalibolo tagala palali.

²⁷Tama te Jerusalemde bidibo we bidi me, augwaligo tobolu bidi dabe me, augwaligo te bidi Jisas agai yali sę page konebe, agai wali po page me augwaligo konebe. Augwaligo te Godigo po polobadu pusa mani bidi profet dabego wali po tigidali Sabat sogode odama, tama augwaligo te po page bugagia konebe. Tiali goli, augwaligo homugo Jisas elaibao homu e baso, polobadu Godigo po pusubo profet bidi dabego wali po megi nai gilama mu walalio.

²⁸Jisasgo dwai kolesaga munu me isąbadi, augwaligo Jisas olo dali po tų ela mani. Augwaligo te bidi Pailat agabolo moni po dagą weyu, te po wali, ‘Te bidi Jisas elao,’ wali.

²⁹Polobadu Godigo po pusa mani bidigo bukude asęani po tiwai augwaligo te sę Jisasgo tigide ela silama, bidi sigo aga ni pedaide daganama, agai tigi selasa pelama, moni masigi dudulawe tomoba mugi pali.

³⁰Tiali goli, Godigo aga ma hodolama, tama ma bidibao.

³¹Tama nosali te polobadu aga dali Galilide bilali hani bidi dabe me aga dali Jerusalemba pali, agai augwalibolo hauwa sogo dią holali. Te hani augwali tigidali Israel we bidi tomode bilu, te ebo suali sę po pusubo dao.”

³²“Tama dadi si me dage pageba sabolama, te Godigo dwagi yai gesi po dagebolo pusa mobao. Tama te bomo yai po Godigo polobadu dago wąįbolo walai po dao. Tama megi te po augwaligo wai puluba da pagede mu pedalalio, da tau somainu yai. God agai Jisas gų pagede ma hodolai dao. Polobadu bidi me deligo te Godide dwagi yai homu eyu wabo tęąbi buku yabe side te po asęani, ‘Godigo te po wai, “Nage eno ogwa mu dao. Tama megi nage eno ogwa mu nigilai dao.” ’

³⁴Jisas isilama, Godigo aga gų pagede ma hodolai, agai tigi nosali damua pogobe. Tama polobadu Godigo te sę yabo homu ebadi, te po wai, te bukude asęani, ‘Polobadu eno Devitbolo po ola mawai, agabolo dwagi yai sę yabo po. Tama megi eno nagebolo me te po e mobao.’

³⁵Tama te asęani buku yabe mede Devitgo te po me Godibolo wali, ‘Naga dwagi yai sę ebo bidi naga agai tigi gų pagede damua pomai hagede tagalogobeo,’ wali.

³⁶Tama Devit agai Godigo sę aga hani we bidi tomode elama, tama aga nosali isai. Tama isąma, augwaligo aga wąįgo masigi dudulaweba mugi pai. Tama tede aga tigi damua pai. Tama dago Devitgo polobadu wali po koneao, te po wali Devit aga tigide wabe. Agai tigide wabeo.

³⁷Tiali goli, te Godigo ma hodolali bidi agai tigi damua pabeo.”

³⁸“Ama dede, dagego te sę bugagia koneao. Dago dagebolo Jisasgo tigidali yali sę dagebolo pusa mobe dao. Tama agai dago tigidali dwai sę ebo sela sąyabo tų nigali. Duga bugagia koneao. Niwai we bidi augwaligo augwa homu Jisasba mubaso da, teda Godigo augwaligo yali dwai sę sela sąwaibao. Tiali goli, Mosesgo bomo yai po dabe augwaligo dagego dwai kolesaga ebo sę sela sągobeo.

⁴⁰Tama dage dua dao. Te Godigo po polobadu pusa mani profet bidi dabe augwaligo wali po dage pagede mu pedalidali weyu, dua dao.

⁴¹Augwaligo te po asęani, Godigo te po wai, ‘Odao, dage Godigo po sela sąbo bidi dabe dao. Dagego tonaluama, moni homu elama, nosali noma siąo. Tiali goli, dage isaibao. Eno dage pagede sę ebadi, dagego te sę ebo dagego homugo mu konegobeo. Tama bidi me deligo dagebolo te sę page pusa mobadi, dagego agai wabo po page bugagia konealugobeo,’ Godigo te tama po wai,” Polgo te po wali.

⁴²Te Pol dali Barnabas dali si te Juda dabego bomo yai po ola mabo bede po pusulama buluba dią sobadi, te we bidi augwaligo tega sibolo te po wai, “Me Sabatde dage sigo dabolo te po ma ola magameo,” wali.

⁴³Tama te we bidi tedela pelama, te Juda dabe hauwa augwali si wali pali. Tama te Juda hani isąwai we bidi hani Juda haniba wadolagasali, augwali me te Pol dali Barnabas dali wali pai. Tama augwali sigo augwalibolo te po ola mani, “Dagego Godigo po odoyu, bugagia bidiąo. Tama God agai bomo dologode bidiąo, agai dage tau somainu, te dage bugagia bidimainu tama yao,” wali.

⁴⁴Te nosali Sabat sogode te be nani we bidi tigidali pąde sisinagasali, tega sigo Genuai Bidigo po wabo odainu yali.

⁴⁵Tama te Juda dabe me badu augwaligo te umabo we bidi sulama, augwali Pol dali Barnabas side dwai homu yali. Augwaligo Polgo wabo po sela sąnama, aga nogi aiyaba elaluali.

⁴⁶Tiali goli, Pol dali Barnabas sigo bomo selama, wi isąma, te po wai, “Dago koneai, Godigo po hasia bolo dage Juda haniba mawainu yai. Tiali goli, dagego agai po sela sąbaso da, teda dago dage Juda hani taga paibao. Duga homugo tama te da, dagego bugagia bida bida pabo kolesaga sogobeo homu ebaso da, teda da te Juda hani isąwai we bidi haniba tau sigi paibao. Godigo dabolo te bomo yai po wai dao,

⁴⁷‘Nage eno sole tiwai nigilibe dao, te Juda hani isąwai te tigidali tǫ pedaide bidalubo we bidi augwaliba ula ilimai hagede ebao. Tama nago tigidali tǫde bidibo we bidi tau selama, Godigo augwali ma somainu yao,’ wali,” Polgo te po wai.

⁴⁸Tama te Juda hani isąwai we bidi augwaligo Polgo wali po odama, augwaligo bugai homu mu yai. Bugai homu mu elama, augwaligo te Genuai Bidigo po ugwaba sai. Tama tigidali we bidi Godigo sesemane bida bida pabo kolesaga somai hagede polobadu sa muai we bidi, tama augwaligo megi Godigo po odama, te po mu po dao homu elama, te poba augwa homu tigidali muani.

⁴⁹Te tǫde bidibo we bidi augwaligo Genuai Bidigo po oda pela silali.

⁵⁰Tama te Antiok be nanide te Juda hani isąwai genuai we dabe bidali. Tiali goli augwaligo Godibolo lotu po wabo dao. Tama te Juda dabe augwaligo te nogi yai we dabe dali, te kaunsil bidi dabe dali tigidalibolo bidi geme posobo po wali, Pol dali Barnabas si elemainogo yai. Tama augwaligo tega si gasa tǫba gudulali.

⁵¹Tama tibaso, augwali sigo sągą nadobade elaluali tǫ hogomu sela sąwani. Te yali sę te page elalubo. Augwali sigo te bidi dabego dwai kolesaga ebo sulama, te sę yali. Tega sigo te po wai, “Duga sę dao.” Tama augwali si te Aikoniam buluba pali.

⁵²Tama te Antiokde bidali Jisasgo po wali pabo we bidi augwali bugai homu yali, te Godigo Dwagi Yai Mobo Bidi augwaligo homude pągąnaluali.