Godigo Sęba Tagala Palai Bidigo Po 10:30-44

³⁰Te Korniliusgo te po wei ponoyu te po wali, “Te polobadu sela sogo polo walio, pioba poloba nai po sela wabode, eno Godibolo po weyu bidibadi, polo te bidi me deli ena pagede dolalubo suali. Agai ugwa ula genuai mu yali.

³¹Agai ena nogi olama, te po wai, ‘Kornilius, God agai nago agabolo po wabo me, te nago nai meni yai we bidi tau sabo dwagi yai kolesaga ebo sulama, Godigo bugai homu ebo.

³²Megi nago me badu bidi te Jopa buluba tagala palao, bidi me deli oda sigi pomainao, te bidi nogi Saimon, agai nogi me Pita. Te bidi aga nogi sabi bidi Saimongo bede bidibo, te tamu ąį pąde. Te nogi sabi bidi Saimon, agai ebo sę te isai kibu kau wali nagamea dwagi yai pomai hagede sę ebo bidi da,’ te po wai.

³³Tama tibaso, eno nage pageba po polo te tagala palai dao. Tama nago dwagi yai kolesaga mu elama, da pageba sabolalio. Tama megi da tigidali Godigo gedude bidibao. Tama dago homugo Genuai Bidigo nagebolo mani po te dago odaibao,” Korniliusgo Pitabolo te po wai.

³⁴Te Pita agai po wabo sę gagalali, “Mu tama dao, megi eno koneanio. God agai deli hani naga homu ebeo. Te mu menio.

³⁵Tigidali haniani po wabo bidi hani augwaligo God wi elama, dwagi yai kolesaga ebaso da, tede Godigo ‘Usu da’ waibao. Duga digi koneai dao.

³⁶Godigo te dwagi yai po da Israel we bidibolo mawai dao. Tama te dwagi yai po page e tiwai da, Jisas Krais da, te tigidali we bidigo Genuai Bidi da. Da tigidaligo aga godolo eyu da, te da dwagi yai homu elama, bugagia bidaibao.

³⁷Duga digi koneai dao. Polobadu Jongo dwagi yai baptais mabo po pusa mawai dao. Te sogo te po te Galili tǫde gagalama, tigidali Judia tǫ usu yai dao.

³⁸Te po duga digi koneai dao. God agai te Nasaret bulu bidi Jisas sa muai. Tama Godigo agai Dwagi yai Mobo Bidi dali, bomo dali si agabolo mawai dao. Tama Jisas aga tigidali bulu bilama, dwagi yai sę ela bilali, tama agai Satango dolai we bidi agai dwagi yai ma ilali. God aga dali bidibaso, te tobage sę yali.

³⁹Tama dago suai dao, agai te sę Jerusalem tomode me, tigidali Israel bulude me, tama dago te yali sę po pusubao. Tama augwaligo aga ni pedaide walama, elai dao.

⁴⁰Tiali goli, sela sogo gų pagede bidama, nosali Godigo aga ma hodolai dao. Tama me badu we bidi augwaligo gedugo aga suali.

⁴¹We bidi tigidali augwaligo aga sube. Da polobadu Godigo agai po pusu maio olama dąį ilai bidi, dago naga aga suai dao. Aga hodaluama, da aga dali hodobo bidu, nai me, ąį me tuai dao.

⁴²Tama dabolo agai bomai po mu mawai dao. Agai ‘Te dwagi yai po te tigidali we bidibolo ola mao,’ wali. Godigo Jisas dąį ilama, tigidali bidibo we bidi me, isali we bidi me, aga po tų yabo bidi nigilama, bidibo. Te sę ebo po me dago te we bidibolo pusa mawaibao.

⁴³Polobadu Godigo po pusa mani bidi tigidali augwaligo agade po wai. Augwaligo te po wai, ‘Magwai we bidi deli deligo augwaligo agaba augwa homu tigidali mubaso da, agai nogigo bomogo augwaligo dwai sę ebo kolesaga God agai sela sąwaibao,’ te Godigo po pusa mabo profet bidi dabego te po wali,” Pitago te po wali.

⁴⁴Te bidi Pita agai po odubadi, te Godigo Dwagi Yai Mobo Bidi te po odobo we bidi tigidali tigiba dulali.