Godigo Nogi Ugwaba Sabo Tęąbi Po Wabo Buku Dabe 81:10-16

¹⁰Ena naga ena Genuai Bidi da, ena dagego God dao. Ena digi dage selama, te Isip taga soyu asai. Dagego pedauwali a olalubadi, tama eno te dage pedauwaliba nai muaibao,” walio.

¹¹“Tiali goli, eno we bidi dabego te eno po me odisąwai. Mu tama, te Israel dabego eno po wali homu me isiąwai dao.

¹²Tama tibaso, eno te augwa hagoma ebo kolesagade wali bilimainu sula tagalali, tama augwa te mena augwa homugo ela palio.

¹³Eno wei mu ebaso, tama eno hani bage augwaligo te eno po odomainu homu yali. Tama eno homugo te Israel dabego te eno homu sesemane wali pomainu homu ebao.

¹⁴Te augwaligo tama tibaso da, teda polo tama eno te augwaligo boi bidi dabe doligi da. Te eno boi bidi dabe augwali dali hwįnama, tama augwali aiyaba mu elalualigi da.

¹⁵Te ena wei homu isiąbo we bidi augwali, teda augwali wi mu dwai elama, tama enaba kidu sugunagasaibao. Tama eno augwaliba te sesemane sogo dene magi dao.

¹⁶Tiali goli, eno wiegi yai nai mu dageba maiyabo homu eyu, tama dage te buside elalubo tubo nai te hani menama, tama dagego haliga te pągąna peyu igi da,” wali.